कुम्हार मन के जमीन म अवैध कब्जा के शिकायत


  • मुख्यमंत्री ह दीस जल्दी कार्रवाई के निर्देश
  • बड़ संख्या मं प्रतिनिधि मंडल, किसान अऊ आम नागरिक मन ह मुख्यमंत्री से करिन मुलाकात 


रायपुर, 22 जून 2017, मुख्यमंत्री डॉ. रमन सिंह ह अदालत मन के आदेश के बाद घलव कुम्हार मन के पांच एकड़ जमीन म कुछ मनखे मन अवैध कब्जा पाछू दस साल करे बईठे हें, ये शिकायत ल गंभीरता से लेत मुख्‍यमंत्री ह आज बिहनिया इहां अपन निवास परिसर मं आयोजित जनदर्शन कार्यक्रम मं बेमेतरा जिला के ग्राम ओटेबंद ले आए कुम्हार मन ल ए प्रकरण मं लउहे न्याय देवाए के आश्वासन दीन अऊ कलेक्टर ल जल्दी कार्रवाई अउ निराकरण के निर्देश दीन। ये गांव कुम्हार मन के मूर्तिकला बर काफी प्रसिद्ध हे।
मुख्यमंत्री ह उंखर ज्ञापन म बेमेतरा जिला के कलेक्टर ल शिकायत के जल्दी निराकरण करे के निर्देश जारी करिन। कुम्हार मन के कहना रहिस कि ओ मन ल अपन परम्परागत व्यवसाय अऊ जीवन-यापन बर भू-राजस्व संहिता 1959 के धारा 237 (2) के तहत सम्पूर्ण प्रक्रिया पूर्ण होए के बाद कुम्हार समाज ल ये वाले जमीन दे गए रहिस। तहसीलदार ह 31 जुलाई 2007 को कुम्हार समाज बर एला सुरक्षित करे रहिस, फेर कुछ मनखे मन ए जमीन म अवैध कब्जा करके खेती करत हे। एखर फलस्वरूप ग्यारा कुम्हार कुटुंब मिटटी शिल्प के अपन व्यवसाय नइ कर पावत हें। कुम्हार मन ह मुख्यमंत्री ल ये घलोक बताइन कि पाछू 11 बरिस मं तहसीलदार, जिला न्यायालय अऊ आयुक्त न्यायालय के फैसला घलोक कुम्हार समाज के पक्ष मं आए हे, तभो ले ओ मन ल कब्जा नइ मिलत हे। जनदर्शन मं राजधानी रायपुर संग राज्य के कई जिला मन ले आए कई संगठन के प्रतिनिधि मंडल, किसान, श्रमिको, छात्र-छात्रा अऊ आम नागरिक मन ह मुख्यमंत्री से मुलाकात करिन। डॉ. सिंह ल जनदर्शन मं विकासखंड बोड़ला (जिला कबीरधाम) के ग्राम कांपा ले आए आवेदक मन ह ज्ञापन सौंपके बताइन कि साल 2011 के आर्थिक गणना मं कांपा ग्राम पंचायत के वार्ड नम्बर तीन, चार अऊ पांच के लगभग 200 आवासहीन गरीब परिवार मन के नाम छूट गए हे। एखर फलस्वरूप ओ मन ल प्रधानमंत्री आवास योजना के लाभ नइ मिल पावत हे। मुख्यमंत्री ह ऊंखर ज्ञापन म कलेक्टर कबीरधाम ल जल्दी परीक्षण करे के निर्देश जारी करे हे। 
मुख्यमंत्री ह जशपुर जिला के ग्राम गायलुंगा के सरपंच श्रीमती मालती प्रधान के तरफ ले जनदर्शन मं प्राप्त ज्ञापन मं उहां स्टाप डेम बनवाए के प्रस्ताव म विचार करे के आश्वासन दीन। डॉ. सिंह ह बालोद जिला के ग्राम पंचायत रानीतराई के सरपंच श्रीमती उर्मिला साहू के मांग म ओखर पंचायत मं सड़क निर्माण काम के मंजूरी दीन। मुख्यमंत्री ल बालोद जिलाच के ग्राम मुढ़िया (जनपद पंचायत डौडीलोहारा) के सरपंच श्री भूपेश नायक अऊ गांव वाले मन ह ज्ञापन सउंप के बताइन कि गांव मं तीन तालाब हे, फेर गर्मि म उंखर पानी अड़बड़ गाढ़ा अऊ हरा रंग के हो जाथे। ए पानी मं नहाए म मनखे मन ल चमड़ी ले संबंधित बीमारियां हो जाथे। उमन ज्ञापन मं बताइन कि खरखरा जलाशय के नहर ले पक्का नाली बनाके ग्राम मुढ़िया के तीन तालाब मन ल निस्तारी बर पानी देहे जा सकत हे। एखर से गर्मि मन मं मनखे मन ल काफी राहत मिलही। मुख्यमंत्री ह ऊंखर ज्ञापन म कलेक्टर बालोद ल जरूरी कार्रवाई के निर्देश जारी करिन। 
किसान क्रांति महासंघ के प्रतिनिधि मंडल ह जनदर्शन मं मुख्यमंत्री ल ज्ञापन सउंप के राजधानी रायपुर के नजदीक भाठागांव के चारबाड़ी (क्रमांक-63) के 34 किसान मन ल स्थायी जमीन मालिक अधिकार देवाए के आग्रह करिन। प्रतिनिधि मंडल के कहना रहिस कि ये किसान ओ जमीन म पाछू बीस बरिस ले काबिज हें। न्यायालय ले घलोक किसान मन के पक्ष मं फैसला आए हे। प्रतिनिधि मंडल ह भाठागांव के किसान मन ल साग-सब्जि मन के खेती बर सोलर सिंचाई पम्प देवाए के घलोक आग्रह करिस। मुख्यमंत्री ह ऊंखर ज्ञापन मन म सहानुभूतिपूर्वक विचार करे के भरोसा दीन। 
Share on Google Plus

About Sanjeeva Tiwari

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment