तीन दिन के दौरा म रायपुर पहुंचिस अमित शाह

रायपुर। भाजपा के राष्ट्रीय अध्यक्ष अमित शाह आज भिनसरहा रायपुर पहुंचिस, हवई अड्डा म बीजेपी कार्यकर्ता मन ह शाह के जोरदार स्वागत करिन। राष्ट्रीय अध्यक्ष के स्वागत बर मुख्यमंत्री रमन सिंह, राष्ट्रीय महासचिव सरोज पांडे अऊ कई सांसद अउ मंत्री मौजूद रहिन।
हवई अड्डा म महिला मोर्चा अऊ युवा मोर्चा के पदाधिकारी मन स्वागत करिन अउ युवा मोर्चा के कार्यकर्ता मन ह भव्य फटफटी रैली निकलाके शाह के परघनी करत कुशाभाऊ ठाकरे परिसर पहुंचिन। आतेच शाह ह बैठक शुरू कर दीस। 
शाह के दौरा ल देखत प्रदेश मं जबर सुरक्षा व्यवस्था के इंतजाम करे गए हे। बताथें कि सुरक्षा एतका चौकसी  रखी गे कि अंदर सीएम के सिक्योरिटी ल घलोक जाय नइ दे गीस। मीडिया तको ल प्रवेश  करन नइ देहे गीस। मंत्री विधायक मन के गाड़ी बाहिर पार्किंग म खड़ा करवाये गीस। एयरपोर्ट ले लेके रेल्वे स्टेशन अऊ बस स्टैण्ड के तीर-तखार म घलोक बड़ अकन पुलिस बल तैनात करे गए है। एखरे संग रायपुर अवईया-जवैया सब्बो रास्ता म घलोक पुलिस बल तैनात हें।
अमित शाह के कार्यक्रम म मंझनिया दू ले तीन बजे तक प्रदेश पदाधिकारी मन के बैठक होइस, तीन ले 3:30 बजे तक मोर्चा-प्रकोष्ठ, चार ले 5:30 बजे तक विभाग अउ प्रकल्प के बैठक होइस। 5:30 ले छै बजे तक आजीवन सहयोग सदस्य मन संग शाह के बैठक होही। संझा 6:30 बजे ले आठ बजे तक प्रदेश कार्यालय म ही समाजिक अउ प्रबुद्ध, विशिष्टजन मन के बैठक होही। रतिहा आठ ले नौ बजे तक शाह सांसद, विधायक मन के साथ जेवन करहीं। रात नौ ले 10 बजे तक सांसद मन के संगे संग बीजेपी विधायक दल के बैठक होही।
शाह के दूसर दिन के कार्यक्रम म बिहनिया संघ कार्यालय म संघ परिवार के संग बैठक होही। शाह ह 10:30 बजे गॉस मेमोरियल ग्राउंड मं मोदी फेस्ट के उद्घाटन करहीं। 11 बजे ले 12:30 बजे तक कार्य विस्तार योजना, पं.दीनदयाल उपाध्याय जन्मशताब्दी समारोह समिति के बैठक लिहिं। 12.30 ले 1.30 बजे तक मंत्रीमंडल के बैठक, तीन ले चार बजे तक आईटी सेल, सोशल मीडिया, मीडिया संपर्क के बैठक लिहिं। संझा चार ले पांच बजे तक चुनाव प्रबंधन टीम संग लोकसभा सीटों के विसय मं चर्चा होही। पांच ले सात बजे तक मेडिकल कालेज सभागार मं प्रबुद्घजन मन के सम्मेलन होही जेमा शाह ह रहीहीं। 7.30 ले नौ बजे तक मुख्यमंत्री निवास मं अखबार अऊ टीवी चैनल वाले संपादक मन संग चर्चा होही। नौ बजे से 10 बजे रात तक उमन कोरग्रुप के संग बैठक करहीं।
अमित शाह दस जून के भिनसरहा 8:30 ले नौ बजे तक स्वच्छता कार्यक्रम मं हिस्सा लेंहीं। नौ ले 10 बजे तक कोरग्रुप, प्रदेश अध्यक्ष, प्रदेश महामंत्री (संगठन), मुख्यमंत्री के संग शाह के वन टू वन चर्चा होही। शाह नौ बजे सोनाखान जाहीं अऊ 10 ले 12:30 बजे तक मुख्यमंत्री डॉ रमन सिंह के संग गिरौदपुरी जाही। जिहां सतनामी समाज के धर्मगुरू बाबा घासीदास के जन्मस्थली अऊ तपोभूमि के दर्शन करहीं। 
मंझनिया एक ले डेढ़ बजे तक प्रेस कांफ्रेंस लेहीं। तीन ले पांच बजे तक महिला लाभार्थी सम्मेलन, इंडोर स्टेडियम मं सामिल होही। पांच ले छै बजे तक भाजपा प्रदेश कार्यालय मं विशेष बैठक होही। संझा सात बजे शाह रायपुर ले रवाना हो जाही।
Share on Google Plus

About gurturgoth.com

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment