मुख्यमंत्री ले दक्षिण कोरिया के कम्पनी के प्रतिनिधि मण्डल ह करिस सौजन्य भेंट

रायपुर, 27 जून 2017। छत्तीसगढ के मुख्यमंत्री डॉ. रमन सिंह ले आज इहां मंत्रालय (महानदी भवन) मा सियोल ले आए दक्षिण कोरिया के कम्पनी हानवहा के वरिष्ठ उपाध्यक्ष श्री लि कांग हुन के सियानी मा कम्पनी के प्रतिनिधि मण्डल ह सौजन्य मुलाकात करिस। कम्पनी के अधिकारी मन ह नया रायपुर संग छत्तीसगढ़ के शहरी क्षेत्र मन कम लागत के आवासीय परियोजना मन मा पूंजी निवेश बर अपन दिलचस्पी दिखाइन। उमन कहिन कि ओ मन पब्लिक-प्राइवेट पार्टनरशिप (पी.पी.पी.) मॉडल मा घलोक ये काम कर सकत हावंय। दक्षिण कोरिया के प्रतिनिधि मण्डल ह नवा रायपुर मा होवत विकास कार्य मन के घलोक प्रशंसा करिन। प्रतिनिधि मण्डल ह बताइस कि युद्धग्रस्त इराक मा प्रभावित मन के पुनर्वास बर बगदाद के तीर ए कम्पनी ह एक लाख मकान मन के एक बड़का कॉलोनी बनाए हवय। मुख्यमंत्री हर ओ मन ल बताइस कि हाऊसिंग सेक्टर के संगें-संग छत्तीसगढ़ मा सौर ऊर्जा, रक्षा उत्पादन, इलेक्ट्रॉनिक्स उद्योग जइसे  क्षेत्र मन मा घलोक निवेश के अच्छा संभावना हावय। मुख्यमंत्री ले दक्षिण कोरिया के प्रतिनिधि मण्डल ह सौजन्य मुलाकात के समय छत्तीसगढ़ सरकार के वाणिज्य अउ उद्योग विभाग के अपर मुख्य सचिव श्री एन.बैजेन्द्र कुमार, मुख्यमंत्री के प्रमुख सचिव श्री अमन कुमार सिंह अउ सचिव श्री सुबोध कुमार सिंह घलोक उपस्थित रहिन। मुख्यमंत्री ह प्रतिनिधि मण्डल ल स्मृति चिन्ह भेंट करिस। आप मन ल बता दन कि कि मुख्यमंत्री डॉ. रमन सिंह हर छत्तीसगढ़ सरकार के व्यापार मिशन के संग पाछू महीना दक्षिण कोरिया के दौरा करे रहिन। उहां उमन कई ठन कम्पनी मन के प्रतिनिधि मन ले मिलके ओ मन ल निवेश के व्यापक संभावना ल देखे बर छत्तीसगढ़ आए के न्यौता देहे रहिन। इही कड़ी मा दक्षिण कोरिया के हानवहा कम्पनी के वरिष्ठ अधिकारी मन के दल हर आज रायपुर आके मुख्यमंत्री से मुलाकात करिन। उमन नया रायपुर के घलोक दौरा करिन। ए कम्पनी मा 40 हजार ले जादा कर्मचारी हावय अउ एकर कुल राजस्व 65 बिलियन अमेरिकी डॉलर हावय। दक्षिण कोरिया मा ये कम्पनी साल 1962 ले इंजीनियरिंग अउ निर्माण के क्षेत्र मा काम करत हावय। कम्पनी के अधिकारी मन ह मुख्यमंत्री ला ये घलोक बताइन कि ओ मन नया रायपुर मा टाउनशिप विकास संग राजनांदगांव मा रक्षा उत्पादन उद्योग लगाय के इच्छुक हावंय। छत्तीसगढ़ मा ऊंखर कोति ले इंजीनियरिंग यूनिट लगाय के घलोक प्रस्ताव हावय।
Share on Google Plus

About Sanjeeva Tiwari

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment