पहली सावन सोमवार : मुख्यमंत्री ह भोरमदेव मंदिर म करिन पूजा-अर्चना

डॉ. रमन सिंह ह मंदिर परिसर म बेल अऊ रूद्राक्ष के पौधा घलोक लगाइन
श्रद्धालु मन ल अपन हाथ ले बांटिंन परसाद
रायपुर, 10 जुलाई 2017। मुख्यमंत्री डॉ. रमन सिंह ह आज सावन महीना के पहिली सोमवार के दिन छत्तीसगढ़ के प्रसिद्ध ऐतिहासिक, पुरात्ताविक अऊ धार्मिक स्थल भोरमदेव के मंदिर म पूजा-अर्चना करके प्रदेश म अच्छा बरसा, अच्छा फसल अऊ किसान मन अउ आम जनता के सुख-समृद्धि बर आशीर्वाद के कामना करिन। ए अवसर म मुख्यमंत्री के धर्मपत्नी श्रीमती वीणा सिंह, लोक निर्माण, गृह और पर्यावरण मंत्री श्री राजेश मूणत विशेष रूप ले उपस्थित रहिन। मुख्यमंत्री ह भोरमदेव मंदिर परिसर म स्‍वयं सेवी संगठन ज्वाइंट हेण्ड्स कोति ले लगाए गए स्टाल पहुंचके श्रद्धालु मन ल अपन हाथ ले परसाद बांटिंन। उमन भोरमदेव मंदिर परिसर म बेल अउ रूद्राक्ष के पौधा रोपण घलोक करिन।  
मुख्यमंत्री ह ए अवसर म कहिन कि भोरमदेव मंदिर अब कबीरधाम जिला के संगें-संग पूरा छत्तीसगढ़ म अपन आस्था अउ धार्मिक महत्व बर जाने जाए लगे हे। इहां हर साल हजारों के संख्या म कांवरिया दर्शन बर पहुंचत हें। उमन ए अवसर म मनखे मन ल शुभकामना दीन अऊ कहिन कि आस्था के केन्द्र भोरमदेव मंदिर भगवान शंकर के प्रसिद्ध मंदिर हे अऊ ओखर कृपा ले किसान मन के सुख समृद्धि बर अच्छा बरसा के घलोक शुरूवात हो गीए हे। ए अवसर म समाजसेवी श्री आनंद सिंह ठाकुर, विधायक श्री अशोक साहू, छत्तीसगढ़ राज्य पिछड़ा वर्ग आयोग के अध्यक्ष डॉ. सियाराम साहू घलोक उपस्थित रहिन। 
आप मन ल बता दन कि हर साल कस ए साल घलोक श्रावण मास के पहिली सोमवार के दिन आज इहां कवर्धा के बुढ़ा महादेव मंदिर ले ऐतिहासिक, धार्मिक अउ पुरातात्विक महत्व के भोरमदेव तक पदयात्रा म हजारों श्रद्धालु सामिल होइन। पदयात्रा म जनप्रतिनिधिगण, भोरमदेव तीर्थ प्रबंधकारिणी सभा के पदाधिकारीगण, अधिकारी मन, गणमान्य नागरिक, बोल बम समिति के पदाधिकारी, खेल संघ, पत्रकार संघ, स्‍वयं सेवी संस्था के पदाधिकारी, रामधुन समिति के पदाधिकारी अऊ स्कूली छात्र-छात्रा मन अऊ गांव वाले मन ह उत्साहपूर्वक हिस्सा लीन। 
पंचमुखी बूढा महादेव मंदिर म भिनसरहा ले ही भोरमदेव पदयात्रा म सामिल होए बर मनखे मन एकत्रित होइन। ए अवसर म श्रावण मास के पहिली सोमवार के दिन बड़ संख्या मं श्रद्धालु मन ह बूढ़ा महादेव मंदिर म पूजा-अर्चना करिन। पदयात्रा म कवर्धा विधायक श्री अशोक साहू, छत्तीसगढ़ राज्य पिछड़ा वर्ग आयोग के अध्यक्ष डॉ. सियाराम साहू, जिला पंचायत के अध्यक्ष श्री संतोष पटेल, श्री राम कुमार भट्ट, जिला पंचायत के पहिली कार्यकारी अध्यक्ष श्री विदेशीराम धुर्वे, कवर्धा नगरपालिका अध्यक्ष श्री देवकुमारी चंद्रवंशी, जिला कलेक्टर श्री नीरज कुमार बनसोड़, बिलासपुर कलेक्टर श्री पी.दयानंद, पूर्व कलेक्टर श्री सिद्धार्थ कोमल सिंह परदेशी जिला के गणमान्य नागरिक अउ बड़ संख्या म श्रद्धालु सामिल होइन। श्रद्धालु बुढ़ामहादेव मंदिर ले भिनसरहा होलीक्रास स्कूल, समनापुर, अमलीडीह चौरा, बरपेला टोला, रेंगाखार कोडार, राजानवागांव ले छपरी होत 16 किमी के पदयात्रा कर भोरमदेव पहुचिन। भोरमदेव मार्ग ग्राम रजपुरा म बेल के पौधा रोपण घलोक करिन। 
श्रावण मास के पहिली सोमवार होए के कारण भोरमदेव मंदिर मे दर्शनार्थि मन के भारी भीड़ उमड़े रहिस। ए दौरान श्रद्धालु मन ह मैकल पहाड के प्राकृतिक सौंदर्य अउ भोरमदेव के पर्यटन सुविधा मन के लाभ उठाइन। भोरमदेव पदयात्रा के आयोजन ऐतिहासिक धरोहर के संरक्षण, कला अउ संस्कृति ल संरक्षित करे, पर्यटन ल बढ़ावा देहे अउ राज्य के खुशहाली के कामना बर करे जाथे।
Share on Google Plus

About Sanjeeva Tiwari

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment