छत्तीसगढ़ म जीएसटी ल मिलीस बढि़या पंदोली: डॉ. रमन सिंह


  • मुख्यमंत्री ह केन्द्रीय वित्त मंत्री ले मिलके ओ मन ल राज्य म जीएसटी अमल के कार्ययोजना के जानकारी दीन
  • जीएसटी उपर रायपुर म 09 जुलाई के दिन सम्मेलन: श्री अरूण जेटली आहीं 


रायपुर, 03 जुलाई 2017। मुख्यमंत्री डॉ. रमन सिंह ह कहिन कि एक जुलाई ले लागू गुडस अऊ सर्विसेस टेक्स (जीएसटी) उपर छत्तीसगढ़ के जनता अऊ व्यावसायिक संस्थान मन ह सकारात्मक रूख देखात एला लउहे अपनाए ल सुरू कर देहे हें। मुख्यमंत्री ह ये जानकारी आज केन्द्रीय वित्त मंत्री श्री अरूण जेटली ल नई दिल्ली म वित्त मंत्रालय म होए मुलाकात के समय दीन। मुख्यमंत्री ह केन्द्रीय वित्त मंत्री ल 9 जुलाई के दिन रायपुर म जीएसटी उपर आयोजित वृहद सम्मेलन अऊ प्रशिक्षण सत्र बर आमंत्रित करिन। केन्द्रीय वित्त मंत्री ह ए सम्मेलन म आए बर सहर्ष स्वीकृति घलोक प्रदान करिन। 
मुख्यमंत्री डॉ. रमन सिंह ह केन्द्रीय वित्त मंत्री ल छत्तीसगढ़ म जीएसटी के प्रशिक्षण अऊ भावी योजना के बारे म विस्तार ले बताइन। उमन कहिन कि हम जुलाई महिना म विकासखंड स्तर तक 500 ले जादा कार्यशाला आयोजित करत हावन। जेमा ब्लॉक स्तर म मुनीम , अकाउण्टेंट अउ कॉमन सर्विस सेंटर के आपरेटर ल प्रशिक्षण देहे जाही। उमन बताइन कि ए प्रशिक्षण केन्द्र मन म स्थानीय स्तर म व्यावसायिक संघ, चार्टर्ड अकाउण्टेंट, कर सलाहकार ल घलोक सम्मिलित करे जाही। 
मुख्यमंत्री ह केन्द्रीय वित्त मंत्री ल बताइन कि राज्य म कुल पंजीकृत व्यवसायी मन के करीबन 92 प्रतिशत व्यवसायी मन ह जीएसटी म पंजीकरण करा लेहे हें। एमां ले जादा झन ल जीएसटी के प्रावधान मन के जानकारी घलोक देहे जा चुके हे। उमन बताइन कि प्रशिक्षण बर जीएसटी एक्ट अऊ नियम के सरल भाखा म जानकारी बर ब्रोशर, पम्पलेट, पीपीटी, एफएक्यू, टवीटर, फेसबुक अऊ आन माध्यम मन ले देहे जात हे। व्यवसासी मन के शंका के समाधान बर घलोक तंत्र विकसित करे जात हे।

Share on Google Plus

About Sanjeeva Tiwari

ठेठ छत्तीसगढ़िया. इंटरनेट में 2007 से सक्रिय. छत्तीसगढ़ी भाषा की पहली वेब मैग्‍जीन और न्‍यूज पोर्टल का संपादक. पेशे से फक्‍कड़ वकील ऎसे से ब्लॉगर.
    Blogger Comment
    Facebook Comment

0 comments:

Post a Comment