छत्तीसगढ़ के गौरव ये, हिन्दी फिल्म के महान निर्देशक अउ अभिनेता किशोर साहू : डॉ. रमन सिंह

cmcg

मुख्यमंत्री ह किशोर साहू जन्मशताब्दी समारोह के शुभारंभ करिन

मुख्यमंत्री डॉ. रमन सिंह ह आज राजनांदगांव के पद्मश्री गोविन्द राम निर्मलकर ऑडिटोरियम म आयोजित हिन्दी फिल्म निर्देशक, निर्माता, अभिनेता अउ पटकथा लेखक स्वर्गीय श्री किशोर साहू के जन्म शताब्दी समारोह के शुभारंभ करिस। मुख्यमंत्री ह ये अवसर म कहिस के स्वर्गीय श्री किशोर साहू राजनांदगांव भर नहीं भलुक छत्तीसगढ़ के गौरव आंय। उमन छत्तीसगढ़ के माटी ले जुड़े ये महान फिल्मकार के सुरता म राष्ट्रीय स्तर म सर्वश्रेष्ठ फिल्म निर्देशक ल सम्मानित करे खातिर छत्तीसगढ़ सरकार कोति ले पुरस्कार सुरू करे के घोषणा करिन। ये सम्मान समारोह बर डॉ. रमन सिंह ह 10 लाख रूपए घलव पास करे के घोषणा कार्यक्रमें म करिन। मुख्यमंत्री ह छत्तीसगढ़ सरकार कोति ले छत्तीसगढ़ी फिल्म मन के सर्वश्रेष्ठ निर्देशक ल घलव सम्मानित करे खातिर दू लाख रूपए के पुरस्कार सुरू करे के घलव घोषणा करिन। उमन छत्तीसगढ़ म फिल्म मन के विकास, निर्माण अउ प्रदर्शन बर उचित वातावरण बनाये के दिसा म घलव सरकार कोति ले जमो जरूरी उदीम उठाये के भरोसा सकलाए जनसमुदाय ल दीन। राजनांदगांव के फिल्म कलाकार श्री नत्थूदादा ह समारोह म डॉ. रमन सिंह के स्वागत करिस।
मुख्यमंत्री ह समारोह म कहिस के छत्तीसगढ़ म फिल्म विकास निगम के गठन करे के मसौदा तैयार करे जात हवय। जल्दी राज्य म फिल्म मन के विकास अउ छत्तीसगढ़ के कलाकार मन के बेहतरी खातिर ये निगम के माध्यम ले काम सुरू करे जाही। उमन शासन स्तर म छत्तीसगढ़ के छोटे शहर मन म सिनेमा घर के स्थापना अउ विकास बर घलव जरूरी कदम उठाये के घलव आश्वासन दीन। कार्यक्रम म स्वर्गीय श्री किशोर साहू के बेटा श्री विक्रम साहू, पुत्री श्रीमती नैना साहू राव, परिजन अंजली साहू, श्री पंकज करण साहू, सहित प्रसिद्ध फिल्म समीक्षक श्री जयप्रकाश चौकसे अउ पटकथा लेखक श्री अशोक मिश्र, लोकसभा सांसद श्री अभिषेक सिंह, महापौर श्री मधुसूदन यादव घलव शामिल होईन।