पावस-प्रसंग म नाच-गान के सुग्‍घर प्रस्तुति ह देखईया मन ल लुभईस

रायपुर, 10 अगस्त 2017। राज्य शासन के संस्कृति विभाग कोति ले आयोजित महंत घासीदास परिसर स्थित मुक्ताकाश मंच म पावस प्रसंग के पहिली दिन पर्यटन संस्कृति अउ सहकारिता मंत्री श्री दयालदास बघेल के विशेष उपस्थिति म कलाकार मन ह नृत्य अऊ संगीत के मनमोहक प्रस्तुति दीन, जऊन ल दर्शक मन सराहिन। श्री बघेल ह कलाकार मन ल शाल श्रीफल अऊ स्मृति चिन्ह भेंट करके सम्मानित करिस। कार्यक्रम के शुरूआत दिल्ली ले आए प्रसिद्ध कत्थक नृत्यांगना सिंझनी कुलकर्णी ह अपन नाना बिरजू महराज के रचना ‘अर्धांग भस्म विभूति सोहे अर्ध मोहनी रूप म अर्धनारीस्वर’ के आकर्षक कत्थक नृत्य ले करिन। ऊंखर नृत्य के कई लचक अऊ लयबद्ध नृत्य ह दर्शक मन ल मंत्रमुग्ध कर दीस। रायपुर के श्री प्रमोद मानिकपुरी अऊ श्री प्रभात देवांगन के बांसुरी वादन ह सबके ध्यान खींचिस, विनय ठाकुर ह तबला वादन करिस। आखरी म रायगढ़ ले आए श्रीमती निशा राकेश शर्मा ह शास्त्रीय गायन प्रस्तुत करिस। ए अवसर म संस्कृति विभाग के संचालक श्री आशुतोष मिश्रा संग बड़ संख्या म दर्शक मौजूद रहिन।