हर तरीका ले फसल बचाय के उदीम करे के निर्देश

अपर मुख्य सचिव कृषि ह करिस फसल मन के बोनी, खाद-बीज अऊ फसल बीमा के समीक्षा

रायपुर, 10 अगस्त 2017। कृषि उत्पादन आयुक्त अऊ अपर मुख्य सचिव श्री अजय सिंह ह आज इहां मंत्रालय (महानदी भवन) वीडियो कॉन्फ्रेसिंग के संग कलेक्टर मन के बैठक लेके खरीफ फसल मन के बोनी, रोपाई, बियासी, खाद-बीज के भण्डारण अउ वितरण, फसल बीमा आदि के समीक्षा करिन। उमन कलेक्टर मन ल कम वर्षा ले प्रभावित फसल मन ल बचाय बर हर तरीका ले उदीम करे के निर्देश दीन। उमन कहिन कि जहां नहर मन ले सिंचाई के सुविधा नइ हे, उहां ट्यूबवेल, सोलर पंप, कुंआ आदि ले सिंचाई के व्यवस्था करके फसल मन ल बचावव। एखर बर विद्युत आपूर्ति अउ ट्रांसफार्मर दुरूस्‍त रखे के निर्देश दीन। श्री अजय सिंह ह कहिन कि 20 अगस्त तक पानी नइ बरसे या अभीन के स्थिति म सुधार नइ होए म नकद फसल जइसे- मूंग, उडद, सरसों, अरसी आदि लेहे के सलाह किसान मन ल देहे जा सकत हे।
बैठक म खाद-बीज अउ खरीफ 2017 म फसल बीमा के जिलेवार समीक्षा करे गीस। उमन सबो बीमित किसान मन के डेटा एंट्री करे के निर्देश दीन। बैठक म सबो जिला कलेक्टर मन ल कई ठन बीमा कंपनी मन कोति ले खरीफ साल 2016 म बीमित किसान मन के बीमा दावा भुगतान बर बने सूची के सत्यापन चार दिन के भीतर करके संचालक कृषि ल देहे के घलोक निर्देश दीन। बैठक म सचिव कृषि श्री अनूप श्रीवास्तव, संचालक उद्यानिकी, प्रबंध संचालक मार्कफेड, प्रबंध संचालक बीज विकास निगम संग सहकारिता, बैंक अउ बीमा कंपनी मन के अधिकारी उपस्थित रहिन।