ए पइत संकल्प पर्व के रूप म मनाए जाही स्वतंत्रता दिवस

प्रधानमंत्री के घोषणा के मुताबिक छत्तीसगढ़ म घलोक तैयारी शुरू
हर गांव म प्रभातफेरी के संग साल 2022 के भारत म होही विचार मंथन

रायपुर, 11 अगस्त 2017। प्रधानमंत्री श्री नरेन्द्र मोदी के घोषणा के मुताबिक ए साल के स्वतंत्रता दिवस ल ’संकल्प पर्व’ के रूप म मनाए के तैयारी छत्तीसगढ़ सरकार ह घलोक शुरू कर देहे हे। मुख्यमंत्री डॉ. रमन सिंह ह अधिकारी मन ल सबो जिला मन म व्यापक जनभागीदारी ले संकल्प पर्व के आयोजन सुनिश्चित करे के निर्देश देहे हें। संकल्प दिवस के अवसर म सबो गांव मन म अंग्रेज मन के खिलाफ साल 1942 म देश म होए ’भारत छोड़ो आंदोलन’ के 75वां वर्षगांठ घलोक मनाए जाही।
राज्य सरकार के पंचायत अऊ ग्रामीण विकास विभाग ह आज इहां मंत्रालय (महानदी भवन) ले ए सिलसिला म प्रदेश के सबो जिला कलेक्टर मन अऊ जिला पंचायत के मुख्य कार्यपालन अधिकारी मन ल परिपत्र जारी कर देहे हे। परिपत्र म केन्द्र सरकार के निर्देश के उल्लेख करत कहे गए हे कि 15 अगस्त ल स्वतंत्रता दिवस ’संकल्प पर्व’ के रूप म मनाए जाय, जेमां ’संकल्प ले सिद्धी’ तक के संकल्प लेहे जाय। ये संकल्प एक नवा जनआंदोलन ’संकल्प ले सिद्धी’ के जनक होही।



विभाग के अपर मुख्य सचिव श्री एम.के. राउत कोति ले जारी परिपत्र म ये घलोक कहे गए हे कि 15 अगस्त के भिनसरहा स्वतंत्रता दिवस समारोह के संग हर गांव म प्रभात फेरी के आयोजन करे जाए, जेमां स्थानीय स्कूल मन के विद्यार्थी, युवा अऊ स्‍वयं सेवी सदस्य मन संग ग्रामीण विकास के कई ठन योजना मन के हितग्राही मन ल घलोक सामिल करे जाए। देश के छै प्रमुख दुस्‍मन- गंदगी, गरीबी, भ्रष्टाचार, आतंकवाद, जातिवाद अऊ सम्प्रदायवाद हे। ए दुस्‍मन मन ल भारत ले बाहिर निकाले के प्रतिज्ञा लेहे जाय। एखर अलावा सबो गांव मन म ’भारत छोड़ो आंदोलन’ के 75वां वर्षगांठ के आयोजन करे जाही।
जनपद पंचायत अऊ जिला पंचायत मन कोति ले सबो ग्राम सभा मन के सदस्य मन ल छपे संकल्प पत्र बांटे जाही, जेमां सामूहिक अऊ व्यक्तिगत प्रतिज्ञा के घलोक प्रावधान रहिही। ग्राम सभा मन म सदस्य के रूप म सामिल सबो ग्रामवासी संकल्प पत्र म हस्ताक्षर करहीं। संकल्प पत्र जिला पंचायत कोति ले सकेल के ऊंखर बारे म पंचायत संचालनालय ल जानकारी देहीं। शपथ के बाद ग्राम सभा मन म ’नया भारत मंथन’ विसय म परिचर्चा घलोक आयोजित करे के निर्देश देहे गए हे, जेमां ग्राम सभा के सदस्य ’वर्ष 2022 म भारत कइसन हो’ विसय म चर्चा करहीं अऊ नवा भारत बर अपन योगदान के घलोक उल्लेख करहीं। आयोजन म आम जनता ल नवा भारत उपर अपन विचार व्यक्त करे बर प्रोत्साहित करे जाही। परिपत्र म बताए गए हे कि ए संबंध म मनखे वेबसाइट www.newindia.in के संग घलोक अपन विचार व्यक्त कर सकत हें। ग्राम पंचायत कोति ले ’नवा भारत मंथन’ विसय म परिचर्चा म मनरेगा श्रमिक, स्व-सहायता समूह मन के सदस्य मन अऊ प्रधानमंत्री ग्रामीण गृह योजना के हितग्राही मन ल घलोक आमंत्रित करे जाही, ताकि सबो मनखे मन के विचार मन के निष्कर्ष के आधार म आवश्यकतानुसार नीतिगत निर्णय लेहे जा सकय।
परिपत्र म जिला पंचायत मन ल कहे गए हे कि ओ मन ए परिचर्चा के निष्कर्ष मन ल संकलित करके महत्वपूर्ण बिन्दु के प्रतिवेदन पंचायत संचालनालय ल भेजंय। संकल्प दिवस मनाए बर ग्राम पंचायत, जनपद पंचायत अऊ जिला पंचायत मन के निर्वाचित जनप्रतिनिधि मन के सम्मेलन घलोक ए महिना आयोजित करे जाही। परिपत्र म जिला पंचायत मन ल संकल्प दिवस के कार्यक्रम मन के कागद बना के अऊ फोटो-वीडियो बना के पंचायत राज मंत्रालय ल भेजे के निर्देश घलोक देहे गए हे।



नवा भारत के निर्माण के संकल्प
स्वतंत्रता दिवस ल संकल्प पर्व के रूप म मनाए बर राज्य सरकार ह परिपत्र के संग ’नये भारत के संकल्प’ के प्रारूप घलोक जिला कलेक्टर मन अऊ जिला पंचायत मन के मुख्य कार्यपालन अधिकारी मन ल भेजे हे। ये संकल्प ग्राम सभा मन म व्यक्तिगत अऊ संस्थागत रूप ले लेहे जाही।

संकल्प ए प्रकार हे:-

हम सब मिलके संकल्प लेवत हावन, एक नवा भारत के।
1942 म हमार स्वतंत्रता सेनानी मन ह एक संकल्प ले रहिन, भारत छोड़ो के अऊ 1947 म वो महान संकल्प सिद्ध होइस, भारत स्वतंत्र होइस।
हम सब मिलके लेवत हावन, 2022 तक नवा भारत के निर्माण के।
हम सब मिलके संकल्प लेवत हावन, स्वच्छ भारत के।
हम सब मिलके संकल्प लेवत हावन, गरीबी फ्री भारत के।
हम सब मिलके संकल्प लेवत हावन, भ्रष्टाचार फ्री भारत के।
हम सब मिलके संकल्प लेवत हावन, आतंकवाद फ्री भारत के।
हम सब मिलके संकल्प लेवत हावन, सम्प्रदायवाद फ्री भारत के।
हम सब मिलके संकल्प लेवत हावन, जातिवाद फ्री भारत के।
नवा भारत के निर्माण के अपन ए संकल्प के सिद्धी बर हम सब, मन अऊ करम ले जुट जाबोन।