स्वतंत्रता दिवस म राज्यपाल के शुभकामना

रायपुर, 14 अगस्त, 2017। छत्तीसगढ़ के राज्यपाल श्री बलरामजी दास टंडन ह 71वां स्वतंत्रता दिवस के अवसर म पूरा देशवासी मन, सेना के जवान मन संग प्रदेशवासी मन ल हार्दिक बधाई देहे हें।
अपन शुभकामना संदेश म राज्यपाल कहिन कि देश के महान स्वतंत्रता संग्राम सेनानी मन अऊ राष्ट्र नायक मन के अथक संघर्ष, बलिदान अऊ त्याग ह देश ल आजादी देवाए हे। आज हम उंखर कुर्बानी के सेतिच आजाद हन अऊ अमन-चैन के सांस लेवत हन। उमन कहिन कि दिन-रात सजग रहिके देश के रक्षा करना अऊ देश बर जीना घलोक महान देशभक्ति के उदाहरण हे। देश के नवयुवक मन म, ए आजादी ल अक्षुण्ण बनाए रखे अउ भारत के एकता अऊ अखण्डता ल मजबूत करे के महत्वपूर्ण जिम्मेदारी हे। आजादी के ए मशाल ल थामे रखे अऊ ओला सुलगात रखे बर ये बहुत जरूरी हे कि हम अपन वीर सपूत मन ल हमेशा याद रखन अऊ ऊंखर प्रेरणादायी उच्‍च आदर्श मन ल हृदय म संजोए रखव।



राज्यपाल श्री टंडन ह कहिन कि ये दिवस, स्वतंत्रता संग्राम सेनानी मन कोति ले देश के विकास बर करे गए परिकल्पना ल साकार करे बर हमला फेर प्रतिबद्ध करे हें। स्वतंत्रता ह हमला व्यापक आजादी, समानता अऊ अधिकार ही नइ प्रदान करय बल्कि एखर संगें-संग हमार कर्तव्य, उत्तरदायित्व अऊ जवाबदेही ल घलोक बढ़ाए हें। हमार देश म आतंकवाद अउ नक्सलवाद जइसे अलगाववादी ताकत बेरा-बेरा म भीतर ले अउ बाहिर ले देश ल कमजोर करे के उदीम करथे, फेर हम अइसन ताकत मन ले निपटत देश ल मजबूत बनाए के संकल्प लेहे हावन। हर भारतवासी के ये फर्ज हे कि देश हित ल ध्यान म रखत काम करंय। हमार देश के बहुरंगी संस्कृति अउ विविधता म एकता के भावना, दुनिया के आघू एक मिसाल हे। श्री टंडन ह विश्वास व्यक्त करत कहिन कि प्रदेश के सबो मनखे मन के सक्रिय सहयोग अऊ भागीदारी ले हमर राज्य अऊ देश विकास के राह म निरंतर आगू बढ़त रहिही अऊ आजादी के आदर्श मन ल प्राप्त करही।