मुख्यमंत्री ह स्कूली लइका मन अऊ नागरिक मन के संग करिन वृक्षारोपण

कमल विहार के वनौषधि उद्यान म रोपिन चंदन के पौधा

रायपुर, 14 अगस्त 2017। मुख्यमंत्री डॉ. रमन सिंह ह आज राजधानी रायपुर के कमल विहार म करीबन ढाई एकड़ के रकबा म विकसित करे जात वनौषधि उद्यान म चंदन के पौधा रोपके उहां पांच हजार वनौषधि पौधा के रोपण के शुभारंभ करिन। मुख्यमंत्री ह स्कूली लइका मन अऊ नागरिक मन के संग वृक्षारोपण करिन। डॉ. सिंह ह ए अवसर म कहिन कि आज हमला हरियाली बढ़ाए के संकल्प लेना चाही। हमर छत्तीसगढ़ साफ-सुथरा अऊ हरा-भरा रहय। उमन प्रदेशवासी मन ल देश के आजादी के 70वां वर्षगांठ के बधाई अऊ शुभकामना दीन। रायपुर विकास प्राधिकरण कोति ले मुख्यमंत्री डॉ.रमन सिंह के नेतृत्व म राज्य सरकार के पांच हजार दिन पूरा होए के अवसर म ए कार्यक्रम के आयोजन करे गीस। कार्यक्रम के अध्यक्षता पूर्व विधानसभा अध्यक्ष श्री धरमलाल कौशिक ह करिन।



कार्यक्रम म लोक निर्माण मंत्री श्री राजेश मूणत, राज्य सभा सांसद डॉ. भूषण लाल जांगड़े, छत्तीसगढ़ राज्य वनौषधि बोर्ड के अध्यक्ष श्री रामप्रताप सिंह, विधायक श्री बर्नाड जोसेफ रोड्रिक्स, छत्तीसगढ़ गृह निर्माण मंडल के अध्यक्ष श्री भूपेन्द्र सवन्नी अऊ छत्तीसगढ़ दुग्ध महासंघ के अध्यक्ष श्री रसिक परमार संग बहुत अकन जनप्रतिनिधि अऊ नागरिक बड़ी संख्या म उपस्थित रहिन।