एनडीए के राष्ट्रपति पद के उम्मीदवार रामनाथ कोविंद

एनडीए कोति ले राष्ट्रपति पद बर बिहार के राज्यपाल रामनाथ कोविंद उम्मीदवार होही। दिल्ली मं सोमवार के दिन होए बीजेपी के संसदीय बोर्ड के बैठक मं बीजेपी कोति ले रामनाथ कोविंद के नाम राष्ट्रपति पद के उम्मीदवार के तौर म पेश करे गीस। अभी के स्थिति ल देखत अब लागत हे कि रामनाथ कोविंद देश के अगला राष्ट्रपति बनहीँ।
रामनाथ कोविंद अभी हाल मं बिहार के राज्यपाल हें, उमन ल 8 अगस्त, 2015 को बिहार के राज्यपाल बनाये गये रहिस। इमन ल बीजेपी हर 1990 मं घाटमपुर लोकसभा सीट ले टिकट देहे रहिस फेर वो मन चुनाव हार गए रहिन। एखर बाद पार्टी हर 1994 अऊ 2000 मं ओ मन ल उत्तर प्रदेश ले दू पइत राज्यसभा सांसद बनाके भेजिस। 1977 मं इमरजेंसी के बखत जनता पार्टी के सरकार बने के बाद वो मन वो समे के प्रधानमंत्री मोरारजी देसाई के निजी सचिव बने रहिन। एखर बाद उमन बीजेपी नेतृत्व के संपर्क मं आइन।
अभी रामनाथ कोविंद जी ऑल इंडिया कोली समाज के अध्यक्ष हावे, उमन बीजेपी के एससी-एसटी मोर्चा के अध्यक्ष घलोक रहे हें। कोविद जी सुप्रीम कोर्ट अऊ हाईकोर्ट मं 16 साल तक ले वकालत के प्रैक्टिस तको करे हें।
उत्तर प्रदेश के कानपुर देहात जिला के परौख गांव मं सन् 1945 मं रामनाथ कोविंद के जन्म होय हे, ईमन अपन तीन भाई मन मं सबसे छोटे हें। ईमन परौख गांव के अपन पैतृक मकान ल सार्वजनिक काम खातिर दान कर देहे हें।
कोविंद जी के शुरुआती पढ़ाई-लिखाई संदलपुर ब्लॉक के खानपुर गांव परिषदीय प्राथमिक अऊ पूर्व माध्यमिक विद्यालय मं होये हे। कानपुर नगर के बीएनएसडी इंटरमीडिएट परीक्षा पास करे के बाद डीेएवी कॉलेज ले बी.कॉम व डीएवी लॉ कालेज ले विधि स्नातक के पढ़ाई पूरा के बाद इमन दिल्ली मं रहिके आईएएस के परीक्षा तीसर प्रयास मं पास करिन। मुख्य सेवा के बजाय एलॉयड सेवा मं चयन होए के कारन कोविंद जी हर नौकरी ल ठुकरा देहे रहिन।