स्वतंत्रता दिवस-2017 : राज्यपाल श्री टंडन ह राजभवन म करिस ध्वजारोहण

रायपुर, 15 अगस्त 2017। राज्यपाल श्री बलरामजी दास टंडन ह 71वां स्वतंत्रता दिवस के अवसर म आज भिनसरहा राजभवन म राष्ट्रीय ध्वज तिरंगा फहराइस, सम्मान गार्ड के सलामी लीन अऊ परेड के निरीक्षण करिन।
राज्यपाल श्री टंडन ह कहिन कि देश के महान स्वतंत्रता संग्राम के सेनानी मन अऊ राष्ट्र नायक मन के अथक संघर्ष, बलिदान अऊ त्याग के कारण ही, आज हम स्वतंत्र देश म सांस लेवत हावन। उमन कहिन कि हमर मेर ए आजादी ल अक्षुण्ण बनाये रखे के जिम्मेदारी हे। हर भारतवासी के ये फर्ज हे कि देश हित ल ध्यान म रखत काम करंय। उमन कहिन कि प्रदेश के सबो मनखे मन के सक्रिय सहयोग अऊ भागीदारी ले ही हमर राज्य अऊ देश विकास के राह म निरंतर आगू बढ़त रहिही अऊ आजादी के आदर्श ल प्राप्त करही।



राज्यपाल श्री टंडन अउ उंखर पत्नी श्रीमती बृजपाल टंडन ह ए अवसर म राजभवन सचिवालय के अधिकारी मन, कर्मचारी मन अउ ऊंखर परिजन मन ले भेंट कर, स्वतंत्रता दिवस के बधाई अउ शुभकामना दीन। ए अवसर म राज्यपाल के सचिव श्री अशोक अग्रवाल, विधि सलाहकार श्री एन.के. चंद्रवंशी, संयुक्त सचिव श्री जनमेजय महोबे संग राजभवन के सबो अधिकारी-कर्मचारी उपस्थित रहिन। राजभवन म आयोजित परेड के नेतृत्व श्री अभिनव कुमार तिवारी उप पुलिस अधीक्षक, राजभवन ह करिस।