नजरी आनावारी रिपोट एक हफ्ता के भीतर तैयार करव – प्रभारी सचिव

प्रभारी सचिव ह लीस जिला स्तरीय अधिकारी मन के बैठक

बालोद, 28 अगस्त 2017। राज्य शासन के प्रमुख सचिव अउ जिला के प्रभारी सचिव श्री अमिताभ जैन ह कहिन कि जिला म पदस्थ जम्‍मो पटवारी अउ ग्रामीण कृषि विस्तार अधिकारी अपन क्षेत्र के हर एक गॉव मन म जाके खेत मन म घूमव अऊ फसल के स्थिति के आकलन करके एक हफ्ता के भीतर नजरी, आनावारी रिपोट तैयार करव। श्री जैन काल संझा इहॉ सर्किट हाऊस म जिला स्तरीय अधिकारी मन के बैठक म निर्देशित करत रहिन। उमन राजस्व विभाग अऊ कृषि विभाग के अधिकारी मन ले कहिन कि ओ मन नजरी आनावारी रिपोट तैयार करे बर पटवारी मन अऊ ग्रामीण कृषि विस्तार अधिकारी मन ल जरूरी मार्गदर्शन देवव। उमन जिला म अल्पवर्षा ले प्रभावित गांव मन के जानकारी लीन। प्रभारी सचिव ह जलाशय मन म जलभराव के स्थिति, हैण्डपम्प मन अऊ नलजल म जलस्तर के जानकारी लीन। उमन कहिन कि नगरीय निकाय मन म घलोक शुद्ध पेयजल के उपलब्धता सुनिश्चित करव।



कलेक्टर डॉ. सारांश मित्तर ह जिला म संचालित कई ठन जनकल्याणकारी योजना मन के प्रगति के विभागवार विस्तारपूर्वक जानकारी दीन। बैठक म जिला पंचायत के मुख्य कार्यपालन अधिकारी श्री राजेन्द्र कुमार कटारा, वनमण्डल अधिकारी श्री गोविंद राव, अपर कलेक्टर श्री ए.के.धृतलहरे, संयुक्त कलेक्टर श्री राजेश नशीने, एस.डी.एम. बालोद श्री हरेश मण्डावी, एस.डी.एम. गुण्डरदेही श्री पी.एल. यादव, डिप्टी कलेक्टर श्री जी.एस.नाग संग कई ठन विभाग मन के जिला स्तरीय अधिकारी मौजूद रहिन।

राज्यपाल श्री टंडन ले हिन्दुस्तान स्काउट्स अउ गाइड्स के पदाधिकारी मन ह करिन सौजन्य भेंट