‘‘सौर सुजला’’ योजना ले दुर्गम क्षेत्र के किसान मन होवत हें लाभान्वित

सोलर पंप ले फसल सिंचाई करके कमावत हें जादा मुनाफा

जगदलपुर, 28 अगस्त 2017। जिला के दुर्गम क्षेत्र के किसान मन अपन खेत मन म अड़बड़ दुरिहा होए के कारन अपन सिंचाई पम्प मन तक बिजली पहुंचाए नइ सकंय, अइसन किसान मन बर अब निराशा के दिन दूर हो गए हे। छत्तीसगढ़ शासन कोति ले शुरु करे गए सौर सुजला योजना के सौर ऊर्जा ले सिंचाई पम्प मन के ऊर्जीकरण करे गए हे अऊ ए योजना के लाभ वो किसान मन ल दिए गए हे जिंकर खेत मन तक बिजली पहुंचाए म सबले जादा समस्या आवत हे। ए योजना ले किसान मन ल बहुत कम लागत म स्वच्छ ऊर्जा ले चलित सिंचाई पम्प मिलथे। सौर ऊर्जा ले चलइया पम्प मन म विद्युत विच्छेद के संभावना कम रहिथे अऊ किसान एकर उपयोग अपन जरूरत के मुताबिक कर सकत हें। क्रेडा कोति ले सोलर सिंचाई पम्प स्थापना ले सिंचित रकबा ल बढ़ाके जिला के किसान मन के जिंदगी म खुशहाली आए जात हे।




अइसे जघा के किसान मन ल सिंचाई बर सोलर शक्ति ले चलित पम्प मन के स्थापना बर चालू करे गए सौर सुजला योजना के शुभारंभ प्रधानमंत्री श्री नरेन्द्र मोदी कोति ले प्रदेश के राजधानी रायपुर म करे गए रहिस। बस्तर जिला के मुण्डागांव निवासी मुंदीराम अऊ सायतु ह अपन खेत मन म सौर सुजला पम्प लगवाके प्रधानमंत्री के हाथ एकर प्रादर्श प्राप्त करे रहिस।

मुंदीराम अऊ सायतू अपन-अपन खेत मन म लगे सोलर पम्प ले खेत मन के भरपूर सिंचाई करत हें। सोलर पम्प ले फसल सिंचाई बर सुविधा मिले के सेती कृषक मन ल खेती करे म बहुत सुविधा होवत हे।

सोलर पम्प स्थापना के पहिली फसल बोए के बाद खेत मन म सिंचाई बर किसान पूरा बरसात उपर ही निर्भर रहत रहिन। बरसात अच्छा होए म फसल अच्छा होत रहिस अउ बरसात नइ होए या कम होए म किसान मन के फसल खराब हो जात रहिस जेखर ले किसान मन ल आर्थिक नुकसान होत रहिस। श्री मुंदीराम ह बताइस कि फरवरी ले जून तक 4 एकड़ रकबा म गर्मी के फसल ले गए हे जेमां ढाई एकड़ रकबा म मक्का के फसल लीन तेकर ले श्री मुंदीराम ल 20 हजार रूपिया के मुनाफा होय हे। अइसनहे उमन शेष रकबा आधा एकड़ म उड़द बोईन जेमां करीबन 20 किलो के पैदावार होइस हे। एखर अकतहा सब्जी-भाजी, धनिया, मूली, पालक भाजी, टमाटर, लाल भाजी अउ बरबट्टी लगाके घलोक किसान भरपूर लाभ लेवत हें। किसान ह बताइस कि हफ्ता म 2 पइत बाजार म साग बेचे म प्रति बाजार 2 हजार रूपिया के लाभ होवत हे, अइसे महीना म करीबन 16-17 हजार रूपिया के किसान मन ल आमदनी होवत हे।



अइसनहे ग्राम मुण्डागांव के किसान सायतु मौर्य ह घलोक सोलर पम्प के माध्यम ले खेत मन म सिंचाई करके भरपूर लाभ लेवत हे। इमन अपन ढाई एकड़ खेत म मक्का के फसल लगाके करीबन 15 हजार रूपिया के मुनाफा कमाउ हें। अइसनहे बांचे रकबा म उड़द बोईस जेमां करीबन 10 पैली मने 20 किलो के पैदावार होइस हे। एखर ले अकतहा सब्जी-भाजी, भिण्डी, मूली अउ प्याज लगाके श्री सायतु मौर्य भरपूर लाभ लेवत हे। किसान ह बताइस कि हफ्ता म 1 पइत बाजार म साग बेंचे ले प्रति बाजार 15 सौ रूपिया के लाभ मिलते हे। अइसनेहे महीना म करीबन 6-7 हजार रूपिया के आमदनी होवत हे।

नजरी आनावारी रिपोट एक हफ्ता के भीतर तैयार करव – प्रभारी सचिव
राज्यपाल श्री टंडन ले हिन्दुस्तान स्काउट्स अउ गाइड्स के पदाधिकारी मन ह करिन सौजन्य भेंट