पंचायत मंत्री श्री चंद्राकर ह ‘‘संकल्प ले सिद्धि‘‘ नवा भारत मंथन के देवाइस शपथ

रायपुर, 29 अगस्त 2017। पंचायत अउ ग्रामीण विकास मंत्री अऊ बालोद जिला के प्रभारी श्री अजय चन्द्राकर ह आज बालोद के नवीन टाऊन हॉल म ‘‘संकल्प ले सिद्धि‘‘ नवा भारत मंथन के संकल्प देवाइस। उमन ‘‘संकल्प ले सिद्धि‘‘ के तहत साल 2022 तक गरीबी, भ्रष्टाचार, आतंकवाद, सम्प्रदायवाद अऊ जातिवाद मुक्‍त भारत अउ स्वच्छ भारत बनाए के संकल्प देवाइन। पूर्व विधायक श्री प्रीतम साहू, श्री विरेन्द्र साहू, श्री लाल महेन्द्र सिंह टेकाम, गणमान्य नागरिक श्री लेखराम साहू, श्री कृष्णकांत पवार, श्री देवेन्द्र जायसवाल, श्री राकेश यादव, श्री राजा दीवान संग पंचायत प्रतिनिधि मन, युवा मन, महिला मन अऊ बड़ संख्या म नागरिक मन ह संकल्प लीन।




प्रभारी मंत्री श्री चन्द्राकर ह मुख्य अतिथि के आसंदी ले कार्यक्रम ल संबोधित करत कहिन कि अंग्रेज मन ल भारत छोड़े बर राष्ट्रपिता महात्मा गांधी ह 1942 म भारतवासी मन बर करो या मरो के नारा दे रहिन जऊन एक चुनौती रहिस। एला देश के स्वतंत्रता संग्राम सेनानी मन ह स्वीकार करिन अऊ भारत ल पॉच साल के भीतर 15 अगस्त 1947 को आजाद करा लीन। उमन कहिन कि प्रधानमंत्री श्री नरेन्द्र मोदी ह भारत छोड़ो आंदोलन के 75वां वर्षगॉठ म देश के जनता ले आव्हान करे हें कि साल 2022 तक नवा भारत के निर्माण हमला करना हे। प्रभारी मंत्री ह प्रधानमंत्री श्री नरेन्द्र मोदी अऊ मुख्यमंत्री डॉ.रमन सिंह के कुशल नेतृत्व म देश अउ प्रदेश म आए क्रांतिकारी बदलाव अउ उल्लेखनीय काम मन के संबंध म विस्तारपूर्वक जानकारी दीन। कार्यक्रम के समाप्ति म छत्तीसगढ़ राज्य पिछड़ा वर्ग आयोग के पहिली सदस्य श्री देवेन्द्र जायसवाल ह आभार व्यक्त करिन।