स्कूली शिक्षा मंत्री श्री कश्यप ह जिला अस्पताल के करिस अवलोकन

मरीज मन ले रूबरू होके ऊंखर स्वास्थ्य के लीन जानकारी : युवा मन ह करिस स्वेच्छापूर्वक रक्तदान
जिला अस्पताल म अवइया 13 सितमबर ले होही वृहद स्वास्थ्य शिविर के आयोजन

नारायणपुर, 29 अगस्त 2017। प्रदेश के स्कूली शिक्षा अऊ आदिम जाति कल्याण मंत्री श्री केदार कश्यप ह जिला अस्पताल नारायणपुर के अवलोकन करके जिला अस्पताल म विशेषज्ञ चिकित्सक मन के व्यवस्था, पैरामेडिकल स्टाफ के पदस्थापना, मरीज मन के उपचार बर सुविधा मन अऊ दवई मन के सुलभता के अलावा जिला अस्पताल म आधुनिक सुविधा मन के जरूरत आदि के बारे म जानकारी लीन। उमन ए दौरान पुरूष वार्ड म उपचारार्थ भर्ती मरीज मन ले रूबरू भेंटकरके उंखर हाल पूछिन अउ जल्‍दी ठीक होए के कामना करिन। ए मौका म नारायणपुर के 11 युवा मन ह स्वेच्छापूर्वक रक्तदान करिन। ए मौका म मुख्य चिकित्सा अउ स्वास्थ्य अधिकारी डॉ एआर गोटा ह अवगत कराइस कि जिला अस्पताल म अवइया 13 सितमबर ले वृहद स्वास्थ्य शिविर के आयोजन करे जाही। जेमां जिला अस्पताल धमतरी अउ कांकेर अऊ मेडिकल कॉलेज जगदलपुर के नाक, कान, गला रोग विशेषज्ञ, स्त्री रोग विशेषज्ञ अउ नेत्र रोग विशेषज्ञ चिकित्सक मन के संग परामर्श अउ उपचार सुविधा देहे जाही। एखरे संग जिला अस्पताल के विशेषज्ञ चिकित्सक अउ आन चिकित्सक मन कोति ले मरीज मन ल चिन्हित करके ओ मन ल विशेषज्ञ चिकित्सक मन के सेवा देवाए के पहल करे जाही। ए दौरान ओ शिविर म मरीज मन ल चिन्हित करके बेहतर उपचार बर राज्य के प्रतिष्ठित सर्वसुविधायुक्त अस्पताल मन म भेजे के व्यवस्था करे जाही। ए मौका म कलेक्टर श्री टोपेश्वर वर्मा, सीईओ जिला पंचायत श्री अशोक चौबे संग क्षेत्र के जनप्रतिनिधि, पंचायत पदाधिकारी अऊ गणमान्य नागरिक मन के अलावा जिला प्रशासन के अधिकारी-कर्मचारी मौजूद रहिन।