उच्‍च शिक्षा बर मदरसा बोर्ड के उदीम सहराए लइक: श्री केदार कश्यप

मदरसा बोर्ड कोति ले आयोजित दस दिवसीय छात्र संपर्क कार्यक्रम पूरा

रायपुर, 30 अगस्त 2017। स्कूल शिक्षा अऊ आदिम जाति विकास मंत्री श्री केदार कश्यप आज इहां उर्दू गर्ल्स स्कूल हायर सेकेण्डरी रायपुर म आयोजित 10 दिवसीय छात्र संपर्क कार्यक्रम के समापन समारोह म मुख्य अतिथि के रूप म सामिल होइन। श्री कश्यप ह कहिन कि छत्तीसगढ़ मदरसा बोर्ड कोति ले आयोजित हाई स्कूल अउ हायर सेकेण्डरी पत्राचार पाठ्यक्रम परीक्षा के ए छात्र संपर्क कार्यक्रम ले अल्प संख्यक समुदाय के छात्र-छात्रा मन के उच्‍च शिक्षा बर जऊन उदीम होवत हे, वो निश्चित रूप ले प्रशंसनीय हे अउ सहराए लइक हे।



उमन कहिन कि जल्‍दीच मदरसा मन म हाई स्कूल अउ हायर सेकेण्डरी स्तर के नियमित कक्षा चालू करे के दिशा म शासन स्तर म प्रयास जारी हे। मोला ये देखके खुशी होवत हे कि इहां बालक मन ले जादा बालिका मन के संख्या हे। बेटी मन आज हर क्षेत्र म आगू बढ़त हें। श्री कश्यप ह कहिन कि हमर छत्तीसगढ़ शिक्षा के क्षेत्र म पूरा भारत भर म अपन नाम रौशन कर सकत हे। हमार राज्य के पढ़ईया लईका मन के क्षमता म कोनो कमी नइ हे। प्रदेश के मुख्यमंत्री डॉ. रमन सिंह के प्रयास ले छत्तीसगढ़ शिक्षा के हब बनत हे। उमन कहिन कि ए छात्र संपर्क कार्यक्रम के माध्यम ले शिक्षक-शिक्षिका मन लइका मन के जादा ले जादा मार्गदर्शन करंय ओ मन ल आगू बढ़ाए के प्रयास करंय।

छत्तीसगढ़ मदरसा बोर्ड के अध्यक्ष श्री मिर्जा एजाज बेग ह बताइस कि प्रदेश के कई जिला मन म ए संपर्क कार्यक्रम के आयोजन छत्तीसगढ़ मदरसा बोर्ड कोति ले करे गए हे। ये मां कांकेर, बिलासपुर, कबीरधाम, रायपुर जिला प्रमुख हे। ए साल मदरसा बोर्ड कोति ले आयोजित परीक्षा म कुल 800 परीक्षार्थी सामिल होए रहिन। एमा सब ले जादा 172 परीक्षार्थी रायपुर ले सम्मिलित होए रहिन। उमन कहिन कि प्रदेश के मुख्यमंत्री डॉ. रमन सिंह अउ स्कूल शिक्षा मंत्री श्री केदार कश्यप ह राज्य म शिक्षा के बिगुल फूंके हे। ऊंखर प्रयास ले ही छत्तीसगढ़ राज्य शिक्षा के क्षेत्र म आगू बढ़त हे।

ए अवसर म मदरसा बोर्ड के सदस्य श्री साजिद पठान, श्री गुलाम कादर खान, स्कूल के संचालक श्री मो. अकरम खान, प्राचार्या श्रीमती नजमुन्निसा, बोर्ड के सचिव श्री इम्तियाज अहमद अंसारी संग बड़ संख्या म शिक्षक-शिक्षका मन, गणमान्य नागरिक अउ छात्र-छात्रा मन उपस्थित रहिन।