स्कूल शिक्षा मंत्री श्री केदार कश्यप ह राष्ट्रीय शालेय क्रीडा प्रतियोगिता म पदक पाए 484 खिलाड़ी मन ल करिन सम्मानित

रायपुर, 30 अगस्त 2017। स्कूल शिक्षा मंत्री श्री केदार कश्यप ह आज इहां राष्ट्रीय शालेय क्रीडा प्रतियोगिता साल 2015-16 म कई ठन खेल म पदक पाए राज्य के 484 खिलाड़ी मन ल सम्मानित करिन। सम्मान समारोह स्थानीय प्रो. जे.एन. पाण्डेय शासकीय बहुउद्देश्यीय उच्चतर माध्यमिक स्कूल रायपुर म आयोजित करे गीस। श्री कश्यप ह पदक पवइया सबो खिलाड़ी मन ल बधाई अऊ शुभकामना दीन। उमन खिलाड़ी मन ले कहिन कि ये एक पराक्रम के पर्व ये। पदक मिले के सिलसिला कभू रूकना नइ चाही। राष्ट्रीय अउ अंतर्राष्ट्रीय स्तर के प्रतियोगिता मन म आप मन पदक जीतके समाज, राज्य अउ देश के नाम रौशन करव।



ए अवसर म राज्य शिक्षा आयोग के अध्यक्ष श्री चन्द्रभूषण शर्मा, लोक शिक्षण संचालक श्री एस. प्रकाश, जिला शिक्षा अधिकारी श्री ए.एन. बंजारा, शाला के प्राचार्य श्री एम.आर. सावंत, राज्य के सबो जिलो ले आए खिलाड़ी ऊंखर पालकगण अउ बड़ संख्या म विद्यार्थी उपस्थित रहिन।