आकाशवाणी के छत्तीसगढ़ी समाचार

पाछू दिन प्रदेश के गौशाला मन म बड़ संख्या म होय गाय मनके मौत के विरोध म आज कांग्रेस ह रायपुर म अनूठा प्रदर्शन करे हे। कांग्रेस कार्यकर्ता मन ह रायपुर शहर म घुमइया गाय मन ल कांग्रेस भवन म इकट्ठा करीन। प्रदेश कांग्रेस अध्यक्ष भूपेश बघेल के अगवई म पार्टी के नेता अउ कार्यकर्ता गाय ल लेके मुख्यमंत्री निवास कोति आगू बढ़ीन फेर पुलिस ह रस्ता म ही रोक लीन। अउ श्री बघेल समेत बड़ संख्या म प्रदर्शन करत कांग्रेस कार्यकर्ता मन ल गिरप्तार करके जेल लेगे।

इही बीच जनता कांग्रेस छत्तीसगढ़ ह घलो आज गाय के मौत के विरोध म प्रदर्शन करीन। जोगी कांग्रेस के कार्यकर्ता मन ह अपन विरोध प्रदर्शन के बेरा भाजपा नेता मनके घर ल गोबर ले लिपे के परयास करीन। फेर पुलिस ह ए कार्यकर्ता मन ल रद्दा म ही रोक लीस। एखर ले गुस्साये कार्यकर्ता मन ह सड़क ल ही गोबर ले लिपना शुरू कर दीन। बाद म पुलिस ह पचास ले जादा कार्यकर्ता मन ल गिरप्तार करे हे। उंहे, मुख्यमंत्री डॅाक्टर रमन सिंह ह कीहिन हे कि गाय मनके मौत के मामला म दोषी मन उपर कठोर कार्रवाई करे गेहे। ओमन कीहिन कि ये मामला म न्यायिक जांच घलो बैठाये गेहे। जांच के बाद अउ कार्रवाई करे जाही।

करोड़ो रूपिया के ठगी करइया डाल्फिन स्कूल के संचालक राजेश शर्मा अउ उंखर पत्नी ल पुलिस ह हैदराबाद ले काली गिरप्तार कर लीस । आज ओमन ल रायपुर म न्यायिक मजिस्ट्रेट प्रथम श्रेणी के न्यायालय म पेश करीन। अदालत ह राजेश शर्मा ल सात दिन के रिमांड म पुलिस ल सौंप देहे। उंहें, ओखर पत्नी उमा शर्मा ल पंद्रा दिन के न्यायिक रिमांड म जेल भेज दे गेहे। खबर के मुताबिक राजेश शर्मा ह डाल्फिन इंटरनेश्नल के नाव ले प्रदेश के कतकोन जगा म स्कूल खोले रीहिस । लईका मनले एकमुश्त फीस ले के नाव म करीबन पचपन करोड़ रूपिया के ठगी करके बछर दू हजार ग्यारा म पत्नी संग फरार होगे रीहिस।




प्रदेश म सूखा के हालत ल देखत राज्य शासन सरलग स्थिति के जानकारी लेवत हे। कृषि विभाग के अपर मुख्य सचिव अजय सिंह ह आज एक उच्च स्तरीय बइठका बलाके स्थिति के समीक्षा करीन। मिले जानकारी के मुताबिक रायपुर जिला म कमती बरसा के सेती कतकोन जगा म बोवई घलो नइ हो पाय हे। उंहें कतकोन जगा म बोवई के बाद बरसा नइ होय के सेती भुंइया म दरार पड़ गेहे।

छत्तीसगढ़ उच्च न्यायालय ह ध्वनि प्रदूषण के मामला म रायपुर के कलेक्टर अउ पुलिस अधीक्षक के संग राज्य के वित्त सचिव अउ अवर सचिव , आवास अउ पर्यावरण ल अवमानना नोटिस जारी करे हे। खबर के मुताबिक पाछू बछर छै दिसंबर के हाईकोर्ट म एक जनहित याचिका दायर करे गे रीहिस। एखर उपर सुनवाई करत हाईकोर्ट ह आदेश दे रीहिस हे कि व्यावसायिक गाड़ी के उपर स्पीकर बजाना ध्वनि प्रदूषण के नियम के खिलाफ हे। कोर्ट ह केहे रीहिस कि पहिली घांव स्पीकर आदि जब्त करे जाही । दूसर बेर फेर कहूं नियम के उल्लंघन करत पाये गीस त गाड़ी के परमीट निरस्तर कर दे जाय। न्यायालय ह ये आदेश ल लागू करे बर कलेक्टर अउ पुलिस अधीक्षक के जवाबदेही तय करे रीहिस। फेर कार्रवाई नइ होय ले असंतुष्ट एक मनखे ह याचिका लगाके न्यायालय ल बताय हे कि पुलिस ह सिरिफ दू ठन गाड़ी के खिलाफ कार्रवाई करे हे। एखर बाद उच्च न्यायालय ह आदेश के सरलग होवत अवमानना के सेती अधिकारी मन ल ये नोटिस जारी करे हे।




छत्तीसगढ़ म बछर दू हजार बीस तक रद्दा दुर्घटना म कम से कम पचास प्रतिशत कमी लाये के परयास करे जाही। ये बात लोक निर्माण मंत्री राजेश मूणत ह आज राजधानी रायपुर म सड़क सुरक्षा अंकेक्षण म प्रशिक्षण कार्यशाला के शुभारंभ के बेरा कीहिन। ओमन कीहिन कि छत्तीसगढ़ म राष्ट्रीय राजमार्ग, प्रंातीय राजमार्ग अउ आने रद्दा मन म दुर्घटना ल रोके खातिर हर संभर परयास करे जाही अउ विभाग कोति ले विशेष अभियान चलाये जाही। ए कार्यशाला के आयोजन प्रधानमंत्री नरेंद्र मोदी के आह्वान म शुरू करे गे संकल्प से सिद्धी न्यू इंडिया मूवमेंट म लोक निर्माण विभाग कोति ले केंद्रीय सड़क अनुसंधान संस्थान के मदद ले करे गेहे।

राज्य जनसंपर्क विभाग म काली बड़ पैमाना म तबादला करे गीस। जारी सूची के मुताबिक उप संचालक जितेंद्र नागेश ल दुर्ग, एम.आर. सहारे ल दंतेवाड़ा जिला जनसंपर्क कार्यालय अउ संतोष मौर्य ल रायपुर संचालनालय म पदस्थ करे गेहे । उंहें सहायक संचालक सौरभ शर्मा ल राजनांदगांव, श्रुति ठाकुर ल जशपुर, नीतिन शर्मा ल बिलासपुर जनसंपर्क कार्यालय ल अउ कमल कुमार बघेल ल रायपुर के संचालनालय म पद दे गेहे। एखर संगेसंग दू सहायक जनसंपर्क अधिकारी अउ सहायक ग्रेड वन अउ दू म घलो तबादला करे गेहे।




– मुख्यमंत्री के रायपुर स्थित निवास म काली होवइया जनदर्शन कार्यक्रम कोनो कारण ले नइ होवय।
– बीजापुर जिला म आज पुलिस अउ माओवादी मनके बीच मुठभेड़ होय के खबर हे । ये मुठभेड़ बेलचर के भुरीपानी के जंगल म होय हे।
– तैंतीसवां चक्रधर समारोह के मउका म जिला स्तरीय महिला कबड्डी प्रतियोगिता के आयोजन रायगढ़ के रामलीला मैदान म करे गीस। समापन समारोह के मुख्य अतिथि रायगढ़ विधायक रोशनलाल अग्रवाल रीहिन।
– बाल अपराध के रोकथाम बर आज ले रायपुर तीर चंदखुरी के पुलिस अकादमी म दू दिवसीय कार्यशाला के आयोजन करे गीस। एखर विषय ज्ञान और जागरूकता के जरिये बच्चों का सशक्तिकरण हवय।
अनुवादक – मीनल तिवारी
साभार – Chhattisgarh Newsonair