श्री राधा माधव गौशाला सेवा सदन के प्रभारी सचिव ह करिस निरीक्षण

परिजन मन के सुरता म पशु मन ल एक दिन चारा खवा के जुरव
प्रभारी सचिव ह गौशाला म एक-डेढ़ घंटा बेरा बिताइस

कवर्धा, 01 सितमबर 2017। कबीरधाम जिला के प्रभारी अउ जल संसाधन विभाग के सचिव श्री गणेश शंकर मिश्रा ह अपन एक दिवसीय प्रवास के समय श्री राधा माधव गौशाला सेवा सदन छपरी के निरीक्षण करिस। ए दौरान ऊंखर संग जिला कलेक्टर श्री नीरज कुमार बनसोड़ पुलिस अधीक्षक डॉ. लाल उमेद सिंह, अपर कलेक्टर श्री प्रदीप कुमार मिश्रा, वनमंडलाधिकारी श्री प्रभात मिश्रा, जिला शिक्षा अधिकारी श्री सतीश कुमार पांडेय, बोड़ला एडीएम श्री गिरिधारी लाल यादव, संस्थापक पंडित अर्जुन शर्मा, श्री माखिजा, श्री संतोष, श्री भरत साहू विशेष रूप ले उपस्थित रहिन।
प्रभारी सचिव श्री गणेश शंकर मिश्रा ह श्री राधा माधव गौशाला सेवा सदन के व्यवस्था मन म प्रसंन्नता व्यक्त करिन अऊ व्यवस्थापक ले कहिन कि ओ मन जादा ले जादा मनखे मन ल गौसेवा ले जोड़ंय अऊ प्रेरित करंय। उमन ए गौशाला म अंदाजन एक ले डेढ़ घंटा के समय बिताइन अऊ उहां के संस्थापक अउ व्यवस्थाप मन ले गौशाला ल अऊ अच्छा अऊ बेहतर बनाए अउ जनसामान्य ल गौसेवा ले जोड़े के सुझाव मांगिंन। पता चले हे कि ए गौशाला म अभी हाल म अंदाजन 220 गाय हें, जिंकर चारा अऊ आन प्रकार के व्यवस्था करे गए हे। प्रभारी सचिव ह उपसंचालक पशु पालन श्री एम.पी.मिश्रा ल निर्देशित करत कहिन कि इहां गोमुत्र अउ गोबर आदि के बायप्रोडक्ट तैयार करव अऊ एकर उपयोग करव अऊ एखर बर अंजोरा पशु फार्म दुर्ग अउ कृषि अनुसंधान केन्द्र कवर्धा ले समन्वय अउ संपर्क करके प्रयास करव। इंहा के बारे म बताए गए हे कि ये गौशाला म साफ-सफाई पशु मन ल चारा देवई अऊ आन काम मन बर नौ मनखे काम करत हें।
प्रभारी सचिव ह गौशाला ले जुड़के गाय मन के सेवा करे बर प्रेरित करइया प्रेरणादायी स्‍लोगन वॉल म लिखे ल घलोक कहिन। उमन कहिन कि आमजन अपन परिजन मन के सुरता म एक दिन इहां आके पशु मन अउ गाय मन ल एक दिन के चारा आदि खवावंय अऊ गौ सेवा ले जुरंय। गौशाला संचालक अउ व्यवस्थापक मन ह घलोक एखर बर अपन सहमति दीन अऊ कहिन कि जादा ले जादा मनखे मन ल एखर बर प्रेरित करे के प्रयास करे जाही। सचिव महोदय ह एकर प्रचार-प्रसार करे बर घलो कहिन। प्रभारी सचिव ह कहिन कि येकर ले पर्यावरण सुरक्षा अउ ओखर संरक्षण घलोक हो सकही। पर्यावरण सचिव ह ए अवसर म गौशाला म गाय मन के चारा के व्यवस्था बर 51 सौ रूपया के राशि प्रदान करिन। उमन ये घलोक कहिन कि मुख्यमंत्री कौशल विकास उन्नयन के तहत युवा मन ल पशुधन प्रशिक्षण ले जोड़े जा सकत हे, एखर अलावा उमन हरही या लावारिस घुमइया पशु मन ल नगरीय क्षेत्र ले मुक्‍त करे बर घलोक निर्देशित करिन। उमन इहां गौशाला म करे गए चारा-भूसा के व्यवस्था मन ल घलोक देखिन।

भोरमदेव मार्ग म बनही शिव वाटिका
प्रभारी सचिव श्री गणेश शंकर मिश्रा छपरी गौशाला ले लहुटत समय भोरमदेव मार्ग म हरियर छत्तीसगढ़ के तहत करे गए पौधा रोपण म विशेष रूप ले बेल के पौधा मन के क्षेत्र के अवलोकन करिन। ए दौरान उमन वन मंडलाधिकारी ल निर्देशित करत कहिन कि बेल के पेड़ अउ पत्र धार्मिक अउ आस्था ले जुड़े हे अऊ ए पौधा के विशेष रूप ले सुरक्षा करे जाना चाही अउ इंकर सुरक्षा बर आमजन ल घलोक जोड़े के उदीम करना चाहि। एखर बर उमन शिव वाटिका के बोर्ड लगाय बर निर्देशित करिन।