मुख्यमंत्री ह राज्य स्तरीय समारोह म दिव्यांगजन मन ल करिन सम्मानित

रायपुर 01 सितमबर 2017। मुख्यमंत्री डॉ. रमन सिंह ह आज इहां नया रायपुर स्थित श्री सत्य सांई सौभाग्यम आडिटोरियम म दिव्यांगजन अऊ मेधावी पढ़ईया लईका मन के सम्मान बर आयोजित ’’दिव्यांगजन राज्य पुरस्कार क्षितिज-अपार संभावनाएं’’ समारोह म दिव्यांग कल्याण बर कार्यरत पांच सस्था, दृष्टि बाधित नियोक्ता एन्टरटिका रायपुर, दृष्टि बाधित मन बर काम करत स्वैच्छिक संस्था आस्था बहुविकलांग कल्याण संस्था भिलाई, श्रवण बाधित मन बर काम करत स्वैच्छिक संस्था बिलासपुर बघिर संघ, अस्थि बाधित मन बर काम करत स्वैच्छिक संस्था दिव्यांग पुनर्वास केन्द्र बालोद अऊ प्रमस्तिष्क अंगाघात/बहुविकलांग मन बर काम करत स्वैच्छिक संस्था बस्तर विकलांग सेवा समिति जगदलपुर ल सम्मानित करिन।
उमन समारोह म 101 दिव्यांगजन मन ल सम्मानित करिन। एमां हाईस्कूल अऊ हायर सेकेण्डरी बोर्ड परीक्षा मन म सबले जादा अंक ले उत्तीर्ण 52 विद्यार्थी, स्नातक अऊ स्नातकोत्तर परीक्षा उत्तीर्ण करइया 34 दिव्यांगजन अऊ लोक सेवा आयोग अउ आन प्रतियोगी परीक्षा मन म उत्तीर्ण 12 दिव्यांगजन अऊ 3 दिव्यांग कर्मचारी दृष्टि बाधित कर्मचारी श्री अरविंद शर्मा धमतरी, श्रवण बाधित कर्मचारी श्री पीयूष सागर बिलासपुर अऊ अस्थि बाधित कर्मचारी श्री रामेश्वर सिंह राजनांदगांव सामिल हे। डॉ. सिंह ह इंकर अलावा दिव्यांगजन मन के कल्याण के क्षेत्र म सर्वश्रेष्ठ कार्य बर बालोद जिला ल घलोक सम्मानित करिन। विधानसभा अध्यक्ष श्री गौरीशंकर अग्रवाल ह समारोह के अध्यक्षता करिन। गृह मंत्री श्री रामसेवक पैकरा, महिला अउ बाल विकास मंत्री श्रीमती रमशीला साहू अऊ पूर्व संसदीय सचिव श्री विजय बघेल विशेष अतिथि के रूप म समारोह म उपस्थित रहिन।