चक्रधर समारोह कलाकार मन के प्रतिभा के मंच- गृह मंत्री श्री पैकरा

दस दिवसीय चक्रधर समारोह के समापन

रायगढ़, 4 सितमबर 2017। गृह, जेल, लोक स्वास्थ्य यांत्रिकी अउ जिला के प्रभारी मंत्री श्री रामसेवक पैकरा आज रायगढ़ के रामलीला मैदान म 33 वां चक्रधर समारोह के समापन समारोह म सामिल होइन। प्रभारी मंत्री श्री पैकरा ह कहिन कि राजा चक्रधर ह कला के साधना करके अंतर्राष्ट्रीय जगत म अपन पहिचान बनाय हें। चक्रधर समारोह के माध्यम ले राष्ट्रीय अउ अंतर्राष्ट्रीय स्तर म राजा चक्रधर ल सम्मान मिले हे। उमन कहिन कि कला ह साधना ये अऊ कलाकार मन ह अपन कला के उम्दा प्रदर्शन करे हें। ये मंच प्रतिभा के मंच हे जिहां राष्ट्रीय अउ अंतर्राष्ट्रीय स्तर के ख्याति प्राप्त कलाकार मन ल देखे के अवसर मिलथे। कला के क्षेत्र म छत्तीसगढ़ म बहुत अकन प्रतिभा हे अऊ संस्कृति विभाग के उदीम ले ओ मन ल आगू बढे के अवसर मिलत हे। छत्तीसगढ़ के कला प्रतिभा ल घलोक आगू आना चाही। उमन कहिन कि सबो के योगदान ले चक्रधर समारोह सफल होय हे। चक्रधर समारोह के भव्य आयोजन बर उमन दर्शक मन अउ जिला प्रशासन ल बधाई अउ शुभकामना दीन। एखर पहिली प्रभारी मंत्री श्री पैकरा ह भगवान गणेश के पूजा-अर्चना करिन अऊ महाराजा चक्रधर सिंह के फोटू म पुष्पांजलि अर्पित करे के बाद दीप प्रज्जवलित करिन।




सहकारिता, संस्कृति अउ पर्यटन मंत्री श्री दयालदास बघेल ह अपन उद्बोधन म कहिन कि सुर-ताल वाले चक्रधर समारोह सिरिफ रायगढ़ ही नहीं भलुक छत्तीसगढ़ के पहिचान बन गए हे। ए मंच म ख्यातिप्राप्त कलाकार सामिल होत हें अऊ खुद ल गौरवान्वित महसूस करत हें। जऊन ए समारोह के महत्ता ल खुदे बताथे। राजा चक्रधर प्रतिभा के धनी, अच्छा नर्तक, वादक अउ लेखक घलोक रहिन। उमन संगीत ले संबंधित पुस्तक मन के रचना करे हें। एके शख्सियत म अतका गुण होना आश्चर्य के बात हे। संगीत के क्षेत्र म उंखर योगदान अविस्मरणीय हे। उंखर स्मृति ल चिरस्थायी बनाए बर करे जात ये आयोजन सराहनीय हे। उमन कहिन कि संस्कृति विभाग के तरफ ले रायगढ़ म चक्रधर कला केन्द्र के स्थापना करे गए हे। जिहां नवा कलाकार मन ल आगू बढे के अवसर मिलही। संस्कृति विभाग के तरफ ले कलाकार मन ल मंच मिलय अऊ ओ मन आघू बढ़ंय एखर बर सरलग उदीम करे जात हे।
कलेक्टर श्रीमती शम्मी आबिदी ह कहिन कि अंतर्राष्ट्रीय कला साधक मन ह चक्रधर समारोह के मंच म अपन प्रस्तुति दीन, जेखर सबो ह आनंद उठाइन। चक्रधर समारोह म पद्मश्री हरिहरन, प्राची शाह, श्री दीपक अरोरा, श्री राकेश चौरसिया, श्री अनीस साबरी संग देश के ख्याति प्राप्त फनकार मन ह अपन प्रस्तुति दीन। बेटी बचाओ-बेटी पढ़ाओ जिला होए के कारण ए अवसर म महिला कुश्ती अउ कबड्डी के सफल आयोजन करे गीस। ए आयोजन म सबो के सहयोग बर उमन आभार व्यक्त करिन।
ए अवसर म प्रभारी मंत्री श्री पैकरा ह विख्यात ओडिसी नृत्यांगना श्रीमती पूर्णाश्री राउत ल शाल अउ स्मृति चिन्ह देके सम्मानित करिन। ए अवसर म संसदीय सचिव श्रीमती सुनीति सत्यानंद राठिया, विधायक श्री रोशन लाल अग्रवाल, श्रीमती केराबाई मनहर, श्री गिरधर गुप्ता, श्री जवाहर नायक, श्री जगन्नाथ पाणिग्राही, कुंवर देवेन्द्र प्रताप सिंह, वरिष्ठ पुलिस अधीक्षक श्री बी.एन.मीणा, जिला पंचायत सीईओ श्रीमती चंदन संजय त्रिपाठी, अपर कलेक्टर श्रीमती प्रियंका ऋषि महोबिया अउ श्रीमती रोक्तिमा यादव, पत्रकारगण अउ कलाप्रेमी दर्शकगण उपस्थित रहिन। ए मौका म चक्रधर समारोह के नोडल अधिकारी श्रीमती प्रियंका ऋषि महोबिया अउ आन महत्वपूर्ण दायित्व के निर्वहन करइया मनखे मन ल सम्मानित करे गीस। ए अवसर म कार्यक्रम के प्रभावी संचालन प्राचार्य श्री राजेश डेनियल ह करिन।