शिक्षक दिवस म मुख्यमंत्री ह सबो शिक्षक मन ल दीन बधाई

रायपुर, 04 सितमबर 2017। मुख्यमंत्री डॉ. रमन सिंह ह काल 5 सितमबर के दिन शिक्षक दिवस के अवसर म आम जनता संग सबो शिक्षक मन ल हार्दिक बधाई अऊ शुभकामना देहे हें। शिक्षक दिवस के पूर्व संध्या म मुख्यमंत्री ह आज इहां जारी अपन बधाई संदेश म कहे हें – स्वतंत्र भारत के इतिहास म ये एक गौरवशाली अऊ यादगार दिन हे। ये दिन हमला अपन देश के महान दार्शनिक अऊ पूर्व राष्ट्रपति सर्वपल्ली डॉ. राधाकृष्णन के जन्म-जयंती के घलोक याद दिलाथे। मुख्यमंत्री ह कहिन – स्वर्गीय डॉ. राधाकृष्णन खुद एक विद्वान चिंतक अऊ प्राध्यापक रहिन, जिकंर जन्म दिन ‘शिक्षक दिवस’ के रूप म आयोजित करके हम सब गौरवान्वित होथन। डॉ. राधाकृष्णन के सम्पूर्ण व्यक्तित्व अऊ कृतित्व हमर अभी हाल के अऊ भावी पीढ़ी बर ‘रोल मॉडल’ हे। डॉ. सिंह ह कहिन – कोनो समाज अऊ देश के निर्माण म शिक्षक मन के भूमिका बहुत महत्वपूर्ण होथे। आदर्श शिक्षक देश के नवा पीढ़ी ल अच्छा शिक्षा देके उज्ज्वल भविष्य बर तैयार करथे। मुख्यमंत्री ह शिक्षक दिवस के अवसर म उम्मीद जताये हें कि छत्तीसगढ़ राज्य म प्राथमिक शाला मन ले लेके कॉलेज अऊ विश्वविद्यालय मन तक कार्यरत सबो शिक्षक राष्ट्र निर्माण म अपन भूमिका ल गंभीरता ले महसूस करहीं अऊ पूरा निष्ठा के संग अपन कर्त्तव्य मन के पालन करत राज्य अऊ देश के विकास म अपन महत्वपूर्ण भागीदारी सुनिश्चित करहीं। डॉ. सिंह ह ए अवसर म सबो शिक्षक मन के स्वस्थ, सुदीर्घ अऊ यशस्वी जीवन के कामना करे हें।