मुख्यमंत्री ह करिन शिक्षक मन ले आव्हान : नवा पीढ़ी के दिल-दिमाग म हमेशा डारव सकारात्मक प्रभाव

प्रदेश के 56 हजार स्कूल मन के 2.44 लाख शिक्षक अऊ 56 लाख लइका ऑन लाइन जुड़हीं मुख्यमंत्री डैश बोर्ड ले
हर स्कूल ल दिए जाही कम्प्यूटर टेबलेट
शिक्षक दिवस समारोह म मुख्यमंत्री के हाथ 45 शिक्षक होइन सम्मानित

रायपुर, 05 सितम्‍बर 2017। मुख्यमंत्री डॉ. रमन सिंह ह शिक्षक मन के आव्हान करे हें कि ओ मन अपन व्यक्तित्व अऊ कृतित्व ले नवा पीढ़ी के दिल-दिमाग म हमेशा सकारात्मक प्रभाव डारे के उदीम करव। उमन कहिन कि शिक्षक कहूं चाहंय त अपन कक्षा के लइका मन के मन म प्रभाव अऊ दुष्प्रभाव दुनों डार सकत हें, फेर एक अच्छा शिक्षक अइसन प्रभाव डारथे कि ओखर देहे शिक्षा लइका मन ल आजीवन याद रहिथे। मैं घलोक अपन बचपन के बहुत अकन शिक्षक मन ल आज घलोक याद करथंव।
मुख्यमंत्री आज इहां शिक्षक दिवस के अवसर म राजभवन म राज्य स्तरीय शिक्षक सम्मान समारोह ल मुख्य अतिथि के आसंदी ले सम्बोधित करत रहिन। समारोह के अध्यक्षता स्कूल शिक्षा अऊ आदिम जाति विकास मंत्री श्री केदार कश्यप ह करिन। संसदीय सचिव श्री अम्बेश जांगड़े विशेष अतिथि के रूप म उपस्थित रहिन। समारोह म मुख्यमंत्री ह देश के दूसर राष्ट्रपति स्वर्गीय डॉ. सर्वपल्ली राधाकृष्णन ल याद करत कहिन कि उमन अपन जन्म दिन पूरा विनम्रता के संग देश के शिक्षक मन के नाम समर्पित कर दीन। आज हम सब उंखर जन्म जयंती शिक्षक दिवस के रूप म मनावत हन। ओ मन करीबन 40 साल तक शिक्षक रहिन। डॉ. राधाकृष्णन के जीवन ए बात के उदाहरण हे कि एक आदर्श शिक्षक कत‍का ऊंचाई तक पहुंच सकत हे। समारोह के आयोजन स्कूल शिक्षा विभाग, लोक शिक्षण संचालनालय अऊ राष्ट्रीय शिक्षक कल्याण प्रतिष्ठान कोति ले करे गीस। मुख्यमंत्री ह डॉ. राधाकृष्णन अऊ देवी सरस्वती के फोटू म माल्यार्पण कर अउ दीप प्रज्ज्वलित करके समारोह के शुभारंभ करिस।




मुख्यमंत्री ह समारोह म 45 शिक्षक मन ल शॉल, श्रीफल, स्मृति चिन्ह अऊ पुरस्कार राशि ले सम्मानित करिन। एमां ले 41 शिक्षक मन ल साल 2016 के राज्य स्तरीय पुरस्कार ले अऊ चार शिक्षक मन ल प्रदेश के महान साहित्यकार मन के नाम म स्थापित राज्य शिक्षक सम्मान स्मृति पुरस्कार ले नवाजिन। मुख्यमंत्री ह प्रदेश के आठ सरकारी स्कूल मन ल उत्कृष्ट विद्यालय के रूप म पुरस्कृत करिन। उमन कहिन कि प्रदेश के 56 हजार स्कूल मन म दू लाख 44 हजार शिक्षक करीबन 56 लाख लइका मन के भविष्य निर्माण के काम बखूबी करत हें। समारोह म सम्मानित होए शिक्षक मन ल बधाई देवत मुख्यमंत्री ह कहिन कि दू लाख 44 हजार शिक्षक मन के बीच ले आप मन के चयन ए पुरस्कार बर होय हे। समारोह के अध्यक्षता स्कूल शिक्षा अऊ आदिम जाति विकास मंत्री श्री केदार कश्यप ह करिन। संसदीय सचिव श्री अम्बेश जांगड़े विशेष अतिथि के रूप म उपस्थित रहिन। स्कूल शिक्षा मंत्री श्री कश्यप ह राज्य शिक्षक पुरस्कार साल 2017 बर चुने गए 37 शिक्षक मन के नांव मन के घलोक घोषणा करिन, जउन मन ल अवइया साल के शिक्षक दिवस समारोह म सम्मानित करे जाही।
मुख्य अतिथि के आसंदी ले आज के समारोह ल सम्बोधित करत डॉ. रमन सिंह ह प्रदेश के शिक्षा व्यवस्था अऊ शिक्षा गुणवत्ता म सुधार बर होवत उदीम मन के घलोक तारीफ करिन। उमन ए दिशा म शिक्षक मन के संगें-संग स्कूल शिक्षा मंत्री श्री कश्यप, सचिव श्री विकासशील अऊ विभाग के सबो अधिकारी मन अऊ कर्मचारी मन के योगदान ल घलोक रेखांकित करिन। डॉ. सिंह ह कहिन – राज्य सरकार ह स्कूल मन ल सूचना प्रौद्योगिकी ले जोड़के छात्र-छात्रा मन, शिक्षक मन अऊ प्राचार्य मन के उपस्थिति के आंकड़ा अऊ हर स्कूल के जरूरी सूचना मन ल ऑन लाइन संकलित करे के योजना बनाय हे। एखर लिए स्कूल मन ल कम्प्यूटर टेबलेट दिए जात हे। एखर जरिये विकासखंड, जिला अऊ राज्य स्तर म उंखर मॉनिटरिंग करे जा सकही। बहुत जल्दी ए योजना के तहत हर एक स्कूल ल मुख्यमंत्री डैश बोर्ड ले घलोक कनेक्ट कर दे जाही। ए प्रकार हमार दू लाख 44 हजार शिक्षक, ऊंखर 56 लाख विद्यार्थी अऊ करीब 56 हजार स्कूल घलोक मोर डैश बोर्ड ले ऑन लाइन जुड़ जाही। मुख्यमंत्री ह आज के समारोह म रायपुर जिला के विकासखंड अभनपुर अऊ जिला कबीरधाम के विकासखंड कवर्धा के सबो स्कूल मन ल कम्प्यूटर टेबलेट वितरण के घलोक शुभारंभ करिन। डॉ. सिंह ह कहिन – कम्प्यूटर टेबलेट म स्कूल अपन कई ठन कक्षा मन के रिजल्ट ल घलोक अपलोड कर सकही। मुख्यमंत्री, स्कूल शिक्षा मंत्री अऊ विभाग के सचिव एखर जरिये हर एक स्कूल के ऑन लाइन मॉनटरिंग कर सकही। डॉ. सिंह ह कहिन – निकट भविष्य म शिक्षक मन के वेतन भुगतान घलोक हर महीना के पहली तारीक ले ही ऑन लाइन कर दे जाही। स्कूल मन ल ऑन लाइन करे म कई ठन खर्चा म बचत होही। शिक्षा के क्षेत्र म नवा टेक्नॉलाजी के उपयोग के दिशा म छत्तीसगढ़ सरकार के ये वाले एक बड़का कदम होही। डॉ. रमन सिंह ह लइका मन के मस्तिष्क म शिक्षक मन के व्यक्तित्व अऊ कृतित्व के प्रभाव के उल्लेख करत अपन बचपन के शिक्षक मन ल घलोक सुरता करिन।




समारोह ल सम्बोधित करत स्कूल शिक्षा मंत्री श्री केदार कश्यप ह कहिन – छत्तीसगढ़ बर गौरव के बात हे कि आज इहां अपन कर्म क्षेत्र म प्रेरणादायक भूमिका निभइया शिक्षक मन ल सम्मानित करे जात रहा हे। मुख्यमंत्री डॉ. रमन सिंह के नेतृत्व म राज्य म प्राथमिक अऊ मिडिल स्कूल बहुत संख्या म खोले गए हे। शिक्षक मन के मेहनत ले राज्य के शिक्षा व्यवस्था लगातार बेहतर होत जात हे। मुख्यमंत्री के निर्देश म राज्य के अच्छा शिक्षक मन ल विकासखंड, जिला अऊ राज्य स्तर म सम्मानित करे बर शिक्षक गौरव अलंकरण के योजना शुरू करे गये हे। श्री कश्यप ह बताइस कि राज्य सरकार ह शिक्षक मन बर पुरस्कार के संख्या घलोक दुगुना कर देहे हे।
श्री कश्यप ह कहिन – प्रदेश के आदिवासी बहुल दंतेवाड़ा, बीजापुर अऊ सुकमा जिला मन म शिक्षा के नवा अऊ आदर्श केन्द्र विकसित होवत हे। दंतेवाड़ा म तो अब संघ लोक सेवा आयोग (यूपीएससी) के प्रतियोगी परीक्षा मन बर कोचिंग के सुविधा घलोक देहे जात हे, जिहां करीबन 250 ले 300 युवा कोचिंग लेवत हें। मुख्यमंत्री ह बालिका शिक्षा ल बढ़ावा देहे बर सरस्वती साइकिल योजना शुरू करे हे। ए योजना के फलस्वरूप राज्य के हाई स्कूल मन म बालिका मन के दर्ज संख्या 50 प्रतिशत ले बढ़के 97 प्रतिशत तक पहुंच गए हे। श्री कश्यप ह ये घलोक बताइन कि मुख्यमंत्री के प्रेरणा ले विभाग कोति ले प्रदेश के उत्कृष्ट विद्यालय मन ल घलोक पुरस्कृत करे के योजना शुरू करे गए हे। संसदीय सचिव श्री अम्बेश जांगड़े ह घलोक समारोह ल सम्बोधित करिन। स्वागत भाषण स्कूल शिक्षा विभाग के सचिव श्री विकासशील ह दीन अऊ संचालक लोक शिक्षण श्री एस. प्रकाश ह आभार प्रकट करिन।
पुरस्‍कार पाए शिक्षक मन के जानकारी इंहा हे.