मुख्यमंत्री ह करिन स्वच्छ पंचायत सम्मेलन के शुभारंभ

रायपुर, 06 सितम्‍बर 2017। मुख्यमंत्री डॉ. रमन सिंह ह आज जिला मुख्यालय बालोद म स्वच्छ पंचायत सम्मेलन के शुभारंभ करिन। उमन ए अवसर म उहां करीबन सात करोड़ 84 लाख रूपिया के लागत ले निर्मित नवा जिला चिकित्सालय भवन अऊ 12 करोड़ 71 लाख रूपिया के लागत ले निर्मित मातृ अउ शिशु स्वास्थ्य केन्द्र (एम.सी.एच.) भवन के घलोक लोकार्पण करिन। ए मन ल मिलाके मुख्यमंत्री ह आज के कार्यक्रम म बालोद जिला बर अंदाजन 73 करोड़ 62 लाख रूपिया के 59 निर्माण काम मन के लोकार्पण, भूमिपूजन अऊ शिलान्यास करिन। एमां पूरा हो गए 23 निर्माण काम मन के लोकार्पण होइस, जेकर लागत 28 करोड़ 29 लाख रूपिया हे। मुख्यमंत्री के हाथ 36 नवा स्वीकृत निर्माण कार्य मन के भूमिपूजन अऊ शिलान्यास होइस, जिंकर निर्माण म करीबन 44 करोड़ 93 लाख रूपिया के लागत आही। ए अवसर म पंचायत अऊ ग्रामीण विकास मंत्री श्री अजय चन्द्राकर, महिला अउ बाल विकास मंत्री श्रीमती रमशीला साहू अऊ लोकसभा सांसद श्री विक्रम उसेंडी घलोक उपस्थित रहिन।