जनदर्शन म मुख्यमंत्री ले करीबन साढ़े तेरा सौ मनखे मन के मुलाकात

कई ठन निर्माण कार्य मन बर एक करोड़ रूपिया तुरंते मंजूर
गंभीर बीमारी मन ले पीड़ित 28 मरीज मन ल संजीवनी कोष ले मिलही मदद
मलेशिया ले बंधन मुक्‍त होके लहुटे मजदूर मन ह घलोक डॉ. रमन सिंह ले मुलाकात करिन

रायपुर, 07 सितमबर 2017। मुख्यमंत्री डॉ. रमन सिंह ह आज इहां अपन निवास परिसर म आयोजित जनदर्शन कार्यक्रम म प्रदेश के कई ठन जिला मन के मनखे मन के समस्या सुनिन। डॉ. सिंह ले एक हजार 338 मनखे मन ह मुलाकात करिन। एमां ले 666 मनखे कई ठन संस्था अऊ संगठन मन के 83 प्रतिनिधि मंडल मन म सामिल रहिन। इंकर अलावा 672 मनखे मन ह व्यक्तिगत समस्या ल लेके मुख्यमंत्री के आघू आवेदन प्रस्तुत करिन।

ए अवसर म पंचायत प्रतिनिधि मन अऊ आन प्रतिनिधि मंडल मन के आवेदन म मुख्यमंत्री ह 25 ठन निर्माण काम मन बर करीबन एक करोड़ रूपिया के धनराशि तुरंते मंजूर कर दीन। उमन गंभीर बीमारी मन ले पीड़ित 28 मरीज मन के इलाज बर संजीवनी कोष ले आर्थिक सहायता के घलोक स्वीकृति प्रदान कर दीन। जनदर्शन म अम्बेडकर अस्पताल रायपुर ले मधुमेह अऊ सिकलिंग के जल्दी जांच बर रक्त परीक्षण के घलोक व्यवस्था करे गए रहिस। डॉक्टर अऊ पैरामेडिकल कर्मचारी मन ह 43 मनखे मन के रक्त परीक्षण करिस। मुख्यमंत्री के जनदर्शन म जांजगीर चांपा जिला ले आए मजदूर मन के प्रतिनिधि मंडल ह ओ मन ल बताइस कि ओ मन ल मलेशिया म अच्छा नौकरी के लालच देके ले जाए गीस अऊ उहां उन सबो 18 मजदूर मन ल बंधक बना ले गीस। राज्य शासन के सहयोग ले कुछ महिना पहिली उनला छोड़ाए गीस। उमन मुख्यमंत्री ले पुनर्वास राशि अऊ संबंधित मनखे ले बकाया मजदूरी देवाए के मांग करिन। मुख्यमंत्री ह ऊंखर आवेदन म जिला कलेक्टर ल जरूरी कार्रवाई के निर्देश जारी करिन। कबीरधाम जिला के ग्राम पंचायत क्षेत्र महली के ग्राम होलिंग टोला निवासी बैगा जनजाति के 28 मनखे मन के तरफ ले घलोक मुख्यमंत्री ल महली ले हलिंग टोला तक सड़क निर्माण बर ज्ञापन सौंपे गीस। संगेच उमन प्रधानमंत्री घर योजना के तहत पक्का मकान देवाए के घलोक आग्रह करिन। डॉ. सिंह ह ऊंखर ज्ञापन म कबीरधाम जिला के कलेक्टर ल जरूरी कार्रवाई के निर्देश जारी करिन।

मुख्यमंत्री ल जनदर्शन म छत्तीसगढ़ अनुदान प्राप्त शिक्षक अउ कर्मचारी संगठन ह अपन कई ठन मांग ल लेके ज्ञापन सौंपिन। डॉ. सिंह ह ऊंखर ज्ञापन म सहानुभूति पूर्वक विचार करे के आश्वासन दीन अऊ उंखर आवेदन वित्त विभाग के प्रमुख सचिव ल भेजवाइन। राजधानी रायपुर के खम्हारडीह नागरिक संघर्ष समिति के प्रतिनिधिमंडल ह घलोक मुख्यमंत्री ले मुलाकात करिन। छत्तीसगढ़ कामधेनु विश्वविद्यालय के पढ़ईया लईका मन ह स्नातकोत्तर अऊ पीएचडी के छात्र मन ल शिष्यवृति प्रदान करे अऊ इन्टर्नशिप के छात्र मन ल शिष्यवृति दिए जाय के निवेदन करिन। मुख्यमंत्री ह कृषि विभाग के अपर मुख्य सचिव ल परीक्षण करके निराकरण करे के निर्देश दीन। अइसनहे कोरबा जिला के कटघोरा-जेजंरा मार्ग के प्रभावित किसान मन ह मुआवजा देवाए के मांग करिन। ए म मुख्यमंत्री ह कोरबा कलेक्टर ल तुरंते निराकरण करे के निर्देश दीन। स्वास्थ्य विभाग के अंतर्गत गांव मन म कार्यरत मितानिन मन के प्रतिनिधि मंडल ह घलोक मुख्यमंत्री ले मुलाकात करिन।