कुमारी सान्या साहू ल अच्‍छा इलाज बर हरसंभव मदद: डॉ. रमन सिंह

रायपुर, 08 सितमबर 2017। मुख्यमंत्री डॉ. रमन सिंह ले काल संझा इहां ऊंखर निवास कार्यालय म पूर्व विधायक श्री पुनीत राम साहू के संग रायपुर के मठपुरैना के निवासी कुमारी सान्या साहू अऊ ऊंखर परिजन मन ह मुलाकात करिन। तेरा साल के कुमारी सान्या साहू ल किडनी के बीमारी हे। ओला घेरी-बेरी डायलिसिस कराए ल परथे। सान्या के पिता श्री भीमलाल साहू ह मुख्यमंत्री ल बताइस कि एक पइत डायलिसिस कराए म करीबन दू हजार रुपिया के खर्च आथे। श्री भीमलाल साहू ह अपन बेटी सान्या के इलाज बर मदद के आग्रह मुख्यमंत्री ले करिस। मुख्यमंत्री ह ओ मन ल मदद के भरोसा देवाइस। आप मन ल बता दन कि मुख्यमंत्री ह एखर पहिली संजीवनी कोष ले कुमारी सान्या साहू ल इलाज बर डेढ़ लाख रुपिया के स्वीकृति प्रदान करे रहिस। मुख्यमंत्री ह कुमारी सान्या ल जल्दी स्वास्थ्य लाभ बर आशीर्वाद प्रदान करिन। कुमारी सान्या साहू के माता श्रीमती डिम्पल साहू घलोक ए अवसर म उपस्थित रहिस।