स्वच्छता बर जागरूकता लाए डोंगरा म क्विज प्रतियोगिता के होइस आयोजन

कलेक्टर के मार्गदर्शन म गांव वाले मन ह रैली निकालके स्वच्छता ल बनाए रखे के दीन संदेश

बलौदा बाजार-भाटापारा, 9 सितम्‍बर 2017। कलेक्टर श्री राजेश सिंह राणा के मार्गदर्शन म विकासखंड बलौदा बाजार के ग्राम पंचायत डोंगरा म सरपंच, पंच, स्व-सहायता महिला समूह के सदस्य, पढ़ईया लईका मन अउ गांव वाले मन ह स्वच्छता रैली निकालके हरेक वार्ड म घूमिन अउ स्वच्छता ल स्थाई रखे के संदेश दीन। स्वच्छता रैली के पाछू प्राथमिक शाला डोंगरा म केबीसी के तर्ज म स्वच्छता संबंधी क्विज प्रतियोगिता आयोजित करे गीस। क्विज प्रतियोगिता म अमिताभ बच्चन के हमशकल श्री अशोक मालू जी ल आमंत्रित करे गए रहिस। प्रतियोगिता म स्वच्छता, उपयोगिता, शौचालय निर्माण के फायदा अउ स्वच्छता संबंधी सवाल पढ़ईया लईका मन ले पूछे गइस। पढ़ईया लईका मन कोति ले सही जवाब देहे म उमन ल पुरस्कार ले सम्मानित करे गीस। श्री अशोक मालू ल अमिताभ बच्चन के रूप म देखके विद्यार्थी मन उत्साहित होइन। सरपंच, पंच, ग्रामीणजन अउ पढ़ईया लईका मन ह स्वच्छता के संकल्प लीन। विद्यार्थी मन ले स्वच्छता संबंधी सवाल मन के जवाब ले स्थानीय ग्रामीण मनखे घलोक प्रभावित होइन।




युवक मन के दल गठित करके ग्राम पंचायत के तालाब मन अउ सार्वजनिक स्थान मन के सफाई करे गीस
गांव वाले मन ह बताइन कि ग्राम पंचायत डोंगरा के तालाब ह गंदा हो गए रहिन, जऊन ल 200 युवक मन दल बनाके तीन दिन तक सरलग साफ-सफाई करके निस्तारी के लइक बनाइन। एकर पाछू गांव म तालाब के साफ-सफाई बर निगरानी दल के गठन करे गए हे। निगरानी दल कोति ले तालाब के पार म गंदगी करइया मनखे ल समझाईश अउ शौचालय के उपयोग करे बर जागरूक करे जात हे। गांव वाले मन ह कहिन कि जिला प्रशासन के संग स्वच्छता बर ग्रामवासी मन ल जागरूक करे गइस। जेखर कारण ग्राम पंचायत के हर एक मनखे साफ-सफाई म विशेष ध्यान देवत हें अउ सार्वजनिक स्थान मन, तालाब मन, हैण्डपम्प मन के तीर-तार के साफ-सफाई करके सौन्दर्यीकरण अउ पौधा रोपण के काम करत हें। ग्राम पंचायत डोंगरा म गांव वाले मन के जागरूकता अउ साफ-सफाई ल देखके आन ग्राम पंचायत के ग्रामीण घलोक तालाब अउ सार्वजनिक स्थान मन के साफ-सफाई करे लगे हें। ग्राम म साफ-सफाई होए ले स्वच्छ गांव, स्वस्थ जन के माहौल हे। ए अवसर म मुख्य कार्यपालन अधिकारी जनपद पंचायत श्री किरण कौशिक, स्वच्छता अभियान नोडल अधिकारी श्री मुरलीकांत यदु संग ग्रामीण बड़ संख्या म उपस्थित रहिन।