डॉ. पाटील ल एक्सटेंशन लीडरशिप अवार्ड : मुख्यमंत्री अऊ कृषि मंत्री ह दीन बधाई

रायपुर, 09 सितमबर 2017। मुख्यमंत्री डॉ. रमन सिंह अउ कृषि मंत्री श्री बृजमोहन अग्रवाल ह इंदिरा गांधी कृषि विश्वविद्यालय रायपुर के कुलपति डॉ. एस.के. पाटील ल एक्सटेन्शन लीडरशिप अवार्ड मिले म ओ मन ल बधाई अउ शुभकामना दीन। भारतीय कृषि अउ खाद्य परिषद कोति ले नई दिल्ली के होटल ताज पैलेस म 10वां ग्लोबल एग्रीकल्चर लीडरशिप समिट-2017 के आयोजन करे गीस। ये मां विश्व के 20 प्रमुख खेती के खांटी जानकार, कृषि वैज्ञानिक अऊ प्रशासक मन ल सम्मानित करे गीस। इही समारोह म कुलपति डॉ. पाटील ल ये वाले अवार्ड मिलीस। हरियाणा के राज्यपाल श्री कप्तान सिंह सोलंकी अउ वर्ल्ड फूड प्राईज फाउण्डेशन के एम्बेस्डर श्री केनिथ क्वीन ह ये वाले सम्मान प्रदान करिन। डॉ. पाटील ल ये वाले सम्मान ऊंखर कोति ले कृषि अनुसंधान, कृषि शिक्षा अउ कृषि विस्तार म प्रगतिशील सोच अउ आधुनिक विचार के संग शैक्षणिक अउ प्रशासनिक कार्य के 30 बछर ले जादा के अनुभव ल देखत देहे गइस।