महिला मन ल स्वास्थ्य अउ भोजन के प्रति जागरूक होना आवश्यक- जमुना सकनी

बीजापुर मे आयोजित होइस राष्ट्रीय पोषण आहार हफ्ता

बीजापुर 09 सितम्‍बर 2017। जिला मुख्यालय के सामुदायिक भवन म आयोजित राष्ट्रीय पोषण आहार हफ्ता के अंतर्गत महिला मन के बेहतर स्वास्थ्य, पोषण अउ शिक्षा के प्रति जागरूकता कार्यक्रम आयोजित करे गीस। कार्यक्रम के मुख्य अतिथि श्रीमती जमुना सकनी ह ए अवसर म उपस्थित महिला मन ल स्वास्थ्य अउ भोजन के प्रति जागरूक रहे ल कहिन। कार्यक्रम नगर पालिका अध्यक्ष श्रीमती भाग्यवती पुजारी, जिला महिला अउ बाल विकास अधिकारी बृजेन्द्र सिंह ठाकुर संग आंगनबाड़ी कार्यकर्ता अउ गर्भवती महिला मन मौजूद रहिन।




राष्ट्रीय पोषण आहार हफ्ता के अंतर्गत आयोजित कार्यक्रम मुख्य म अतिथि जिला पंचायत अध्यक्ष श्रीमती जमुना सकनी ह गर्भवती महिला मन ले कहिन कि ए दौरान अपन स्वास्थ्य के अऊ खान पान के विशेष ध्यान देना हे। नियमित रूप ले अस्पताल म जाके स्वास्थ्य के जांच कराना जरूरी हे। गर्भ के समय अकतहा सावधानी बरते के जरूरत होथे एखर बर बेरा म स्वास्थ्य अउ आंगनबाड़ी कार्यकर्ता मन ले संपर्क करत रहना जरूरी हे। ए अवसर म जिला महिला अउ बाल विकास अधिकारी बृजेन्द्र सिंह ठाकुर पोषण आहार हफ्ता के आयोजन के महत्व ल बतात कहिन कि ए आयोजन के उद्देश्य गर्भवती महिला मन अउ शिशुवती माता मन म स्वास्थ्य शिक्षा अउ पोषण के प्रति जागरूक करना हे। हमार क्षेत्र म कुपोषण के समस्या जादा हे एला दूर करे बर पौष्टिक आहार जरूरी हे। एखर संगें-संग स्वास्थ्य बर टीकाकरण के जरूरत होथे जऊन ल समय म स्वास्थ्य कार्यकर्ता मन ले सलाह लेके लगवाना जरूरी होथे। विभाग के अंतर्गत अब गर्भवती महिला मन ल गरम भोजन देहे जात हे एखर बर विभाग कोति ले बेहतर व्यवस्था करे जात हे।
ए मौका म चलचित्र के प्रदर्शन करके गर्भवती महिला मन अउ 6 महिना तक के शिशु मन ल कइसे भोजन देहे जाना हे एखर बारे म जानकारी देहे गीस।