कलेक्टर पूछिस मेंडापारा गुमड़ा स्कूल म पहड़ा

सीईओ ह करिस माध्यमिक शाला बोदली के निरीक्षण

दंतेवाड़ा 09 सितंबर 2017। कलेक्टर श्री सौरभ कुमार आज डॉ. एपीजे अब्दुल कलाम शिक्षा गुणवत्ता अभियान के अंतर्गत शाला गुणवत्ता के जांच बर मेंडा पारा गुमड़ा स्कूल पहुँचिन। इहां कलेक्टर ह लइका मन ले बारहखड़ी पूछिन। अंगरेजी के अक्षर मन के बारे म पूछिन। वर्णमाला ले निकलइया शब्द मन के फोटू के संबंध म पूछिन। उमन लइका मन ल शाबासी दीन। कलेक्टर ह शाला प्रबंधन समिति के रजिस्टर चेक करिन। उमन शैक्षणिक स्टाफ ले पूछिन कि शाला प्रबंधन समिति कोति ले देहे सलाह मन के कइसे पालन करे जात हे। ओ मन लइका मन ल पढ़ाए बर कइसन नवाचार के उपयोग करत हें। शाला म का का बुनियादी समस्या हे। उमन हैंडपंप ले अवइया पानी के गुणवत्ता के संबंध म पूछिन अऊ शाला के हैंडपंप के पानी घलोक टेस्ट करिन। कलेक्टर ह कहिन कि स्वच्छता अभियान के संबंध म लइका मन ल जागरूक रखना जरूरी हे काबर कि स्वच्छता एक आदत ये। जब ये छोटे उमर म लइका मन म आ जाथे त जीवन भर संग रहिथे। उमन कहिन कि सीखे के प्रक्रिया जतका रोचक होथे ओतकेच लइका मन के पढ़े म मन लागथे ए खातिर खेल-खेल म ही मनोरंजन के माध्यम ले लइका मन ल पढाके ओ मन ल जल्दी सिखाए जा सकत हे। कलेक्टर ह कहिन कि मैं देखत हंव कि आप मन के विद्यालय म प्रिंट रीच वातावरण बहुत अच्छा हे। चार्ट के माध्यम ले, तस्वीर मन के माध्यम ले चीज मन ल सिखाए म ये जादा असरकारक होथे अऊ देर तक याद रहिथे।




जिला पंचायत सीईओ ह घलोक आज शिक्षा गुणवत्ता अभियान के अंतर्गत माध्यमिक शाला बोदली के निरीक्षण करिस। उमन लइका मन के कॉपी देखिन। उंखर ले गणित अऊ हिंदी के छोटे-छोटे सवाल पूछिन। उमन स्कूल म प्रिंट-रीच वातावरण के संबंध म घलोक शिक्षक मन ले पूछिन। उमन कहिन कि शाला प्रबंधन समिति जतका जादा सक्रिय होही, ओतके जादा स्कूल म गुणवत्ता बाढ़ही। सीईओ ह मध्याह्न भोजन के गुणवत्ता, साफ-सफाई के संबंध म घलोक शैक्षणिक स्टाफ ले जानकारी लीन।