मुख्यमंत्री ले दंतेवाड़ा जिला के गांव वाले मन ह करिन सौजन्य मुलाकात

बोनस के घोषणा म गांव वाले मन ह जताइन खुशी

रायपुर, 11 सितम्‍बर 2017। मुख्यमंत्री डॉ. रमन सिंह ले ऊंखर निवास परिसर म पूर्व विधायक श्री भीमा मण्डावी के नेतृत्व म दक्षिण बस्तर (दंतेवाड़ा) जिला के 87 गांव वाले मन ह सौजन्य मुलाकात करिन। गीदम अऊ बचेली विकासखंड के ए गांव वाले मन के प्रतिनिधि मंडल ह मुख्यमंत्री डॉ. सिंह ल, अपन क्षेत्र म संचालित विकास गतिविधि मन के बारे म बताइन। मुख्यमंत्री डॉ. सिंह ल इमन किसान मन ल बोनस देहे के निर्णय बर बधाई घलोक दीन।

ए अवसर म मुख्यमंत्री डॉ. सिंह ह गांव वाले मन ले बातचीत करत कहिन कि गांव, गरीब अऊ किसान के विकास सरकार के प्राथमिकता म हे। राज्य म अल्प वर्षा अउ सूखा के स्थिति म किसान मन ल कोनो दिक्कत झन होवय, एखर बर सरकार पूरा संवेदनशीलता के संग काम करत हे। राज्य सरकार कोति ले किसान मन के हित ल ध्यान म रखत कार्य-योजना घलोक बनाय गए हे। ये मां किसान मन ले साल 2016 म समर्थन मूल्य म खरीदे गए धान म दीपावली के पहिली बोनस के राशि दे देहे जाही। उमन कहिन कि एखर अलावा सूखा प्रभावित क्षेत्र मन के किसान मन ल राजस्व पुस्तक परिपत्र के प्रावधान के तहत फसल नुकसान के मुआवजा अऊ प्रधानमंत्री फसल बीमा योजना के घलोक लाभ देवाए जाही। उमन कहिन कि राज्य सरकार हर मुश्किल म किसान मन के संग खड़े हे।

मुख्यमंत्री डॉ. सिंह ह गांव वाले मन ल ये घलोक बताइन कि राज्य के दंतेवाड़ा अउ बस्तर आदि सुदूर वनांचल तक तेजी ले विकास बर विशेष ध्यान देहे जात हे। एखर तहत उहां सुगम आवागमन बर सड़क मन के जाल बिछाए जात हे। अइसनहे आधुनिक दौर के जइसे मोबाइल कनेक्टिविटी जइसे संचार साधन मन के विस्तार बर विशेष प्रयास करे जात हे। उमन कहिन कि ए क्षेत्र मन म नक्सलवाद जइसे गंभीर समस्या म घलोक जल्दी काबू पा ले जाही। मुख्यमंत्री डॉ. सिंह ह गांव वाले मन ले बातचीत करत क्षेत्र के विकास बर उंखर हर मांग म तत्परता ले कार्रवाई बर घलोक आश्वासन दीन।