मुख्यमंत्री ले लैलूंगा क्षेत्र के गांव वाले मन करिन मुलाकात

रायपुर, 13 सितम्‍बर 2017। मुख्यमंत्री डॉ. रमन सिंह ले इहां मंत्रालय स्थित ऊंखर कार्यालय कक्ष म संसदीय सचिव श्रीमती सुनीति सत्यानंद राठिया के नेतृत्व म रायगढ़ के लैलूंगा क्षेत्र ले आए गांव वाले मन के प्रतिनिधि मण्डल ह मुलाकात करिन। उमन लैलूंगा क्षेत्र के कई बछर ले लंबित तिलगा-भगोरा-जामगांव सड़क के निर्माण कराए के आग्रह मुख्यमंत्री ले करिन। उमन बताइन कि सड़क के बने ले 15 ग्राम पंचायत मन के करीबन 25 गांवो म करीबन 50 हजार गांव वाले मन ल आवागमन के बने सुविधा मिलही। प्रतिनिधि मण्डल ह ये घलोक बताइन कि 15.50 किलोमीटर लम्बा ए सड़क बर 2152 करोड़ रूपिया के प्राक्कलन घलोक तैयार कर ले गए हे। ये सड़क रायगढ़ मुख्यालय ल ओडिसा के सीमावर्ती क्षेत्र मन ला जोड़थे। मुख्यमंत्री ह ए संबंध म उचित कार्यवाही के आश्वासन दीन। प्रतिनिधि मण्डल म तिलगा ग्राम पंचायत के सरपंच श्री उधव राठिया, भगौरा ग्राम पंचायत के सरपंच श्री गिरधर साव संग सर्वश्री मनीष शर्मा, विजय शर्मा, संजय शर्मा संग बहुत अकन ग्रामीण सामिल रहिन।