शिक्षा के अवसर देवाना हमर दायित्व- श्री अग्रवाल

मिशन स्कूल म छात्रा मन ल सायकल वितरण : स्कूल विकास बर 6 लाख के घोषणा

बिलासपुर, 13 सितम्‍बर 2017। शिक्षा के अवसर देवाना हमर कर्तव्य हे। छात्र मन बर आज शिक्षा के बहुत अवसर देहे गए हे। हमर कोसिस हे कि भावी पीढ़ी पूरा शिक्षित होवय। एखर ले देश प्रगति करही। ये बात नगरीय प्रशासन, उद्योग अउ वाणिज्यिक कर मंत्री श्री अमर अग्रवाल ह आज मिशन उ.मा.विद्यालय म सरस्वती सायकल वितरण के अवसर म कहिन।

नगरीय प्रशासन मंत्री श्री अग्रवाल ह कहिन कि पहिली शिक्षा के अवसर मिलते नइ रहिस। प्रतिभा मन अपन भविष्य निर्माण करे म अक्षम रहिन। पूर्व प्रधानमंत्री श्री अटल बिहारी बाजपेयी ह हर एक लइका ल शिक्षा के अधिकार देवत सबको शिक्षा के अवसर देवाइन। उमन कहिन कि पहिली मीडिल ले हाईस्कूल तक छात्रा मन मात्र 42 प्रतिशत स्कूल जात रहिन। अब वो हमर सरकार कोति ले सरस्वती सायकल वितरण करे ले 92 प्रतिशत छात्रा मन स्कूल आथें। आज शिक्षा पाना हर लइका के अधिकार हे। उमन कहिन कि मिशन हाईस्कूल 11 साल बाद 100 साल पूरा कर लेही। उमन स्कूल कोति ले देहे गए शिक्षा ल उल्लेखनीय बतात कहिन कि ये स्कूल आजादी के पहिली ले ही शिक्षा के क्षेत्र म सतत् सेवा देवत हे। उमन स्कूल के विकास बर 6 लाख देहे के घोषणा करिन। कार्यक्रम म महापौर श्री किशोर राय, स्कूल के प्राचार्य श्री पी.आर. पाल, स्कूल के शिक्षक-शिक्षिका मन संग राजेश मिश्रा, भारी संख्या म छात्र-छात्रा मन मौजूद रहिन। कार्यक्रम के शुरूआत प्रभू ईशु के प्रार्थना ले करिस।

महंती स्कूल म सायकल वितरण

नगरीय प्रशासन, उद्योग अउ वाणिज्यिक कर मंत्री श्री अमर अग्रवाल ह महंती उ.मा. विद्यालय म 183 छात्रा मन ल सायकल वितरण करिस। उमन ए अवसर म स्कूल म जरूरी मूलभूत सुविधा बर हर संभव सहयोग देहे के बात कहिन। ए अवसर म महापौर श्री किशोर राय, श्री अशोक विधानी, श्री अंजनी कश्यप, श्रीमती एस.नजाक अली, अजय नजाक अली, प्राचार्या श्रीमती एस.एस. उपाध्याय, स्कूल के शिक्षक, शिक्षिका मन, छात्र-छात्रा मन उपस्थित रहिन।