मुख्यमंत्री ले 400 किसान मन करिन सौजन्य मुलाकात : धान बोनस के घोषणा म दीन धन्यवाद

मुख्यमंत्री 11 अकटूबर के दिन गरियाबंद म किसान मन ल दिहीं 73 करोड़ रूपिया के बोनस

रायपुर, 13 सितम्‍बर 2017। मुख्यमंत्री डॉ. रमन सिंह ले आज इहां ऊंखर निवास म गरियाबंद जिला के राजिम विधानसभा क्षेत्र ले आए 400 ले जादा किसान मन ह विधायक श्री संतोष उपाध्याय के नेतृत्व म सौजन्य मुलाकात करिन। किसान मन ह मुख्यमंत्री ल धान बोनस के घोषणा बर आभार प्रकट करिन। मुख्यमंत्री ह ओ मन ल संबोधित करत कहिन – किसान मन ल धान के बोनस देहे बर मैं खुद 11 अकटूबर के दिन जिला मुख्यालय गरियाबंद आहूं। राजिम क्षेत्र संग पूरा गरियाबंद जिला के किसान मन ल 73 करोड़ रूपिया के बोनस दे जाही। उमन कहिन- गांव, गरीब अऊ किसान हमर प्राथमिकता म हे। ये हर्ष के विसय हे कि प्रधानमंत्री श्री नरेन्द्र मोदी ह छत्तीसगढ़ के किसान मन ल धान के बोनस देहे बर राज्य सरकार के प्रस्ताव म अपन सहमति प्रदान कर देहे हे। किसान मन ल दीपावली ले पहिली बोनस मिल जाही। एखर से ओ मन दीपावली के तिहार बड़ खुशी ले मना सकही। मुख्यमंत्री ह कहिन कि राज्य सरकार ह प्रधानमंत्री श्री नरेन्द्र मोदी के जनम दिन 17 सितमबर ल ‘स्वच्छता सेवा दिवस’ के रूप म मनाए के निर्णय लेहे हे। स्वच्छ भारत मिशन के तहत पूरा प्रदेश ल दू अकटूबर 2018 तक खुले म शौचमुक्त घोषित करे के लक्ष्य हे। उमन ये मां किसान मन अऊ पंच-सरपंच मन ले सक्रिय सहयोग के आव्हान करिन। ए अवसर म श्री अनिल चन्द्राकर, सोमप्रकाश साहू, आशीष शर्मा, अनूप भोसले, संजीव चन्द्राकर संग बहुत अकन किसान उपस्थित रहिन।