वेणुधर हत्याकांड के होही लउहे जांच: डॉ. रमन सिंह

मुख्यमंत्री ह नागरिक मन के प्रतिनिधि मंडल ल दीन आश्वासन

रायपुर, 13 सितम्‍बर 2017। मुख्यमंत्री डॉ. रमन सिंह ह बागबाहरा के नागरिक मन ल विश्वास देवाए हें कि गरीब कपड़ा कारोबारी श्री वेणुधर सिंह के हत्या के मामला के तत्परता ले जांच कराए जाही। अपराधी मन के युद्धस्तर म पता लगाए जाही अऊ कोनो दोषी मनखे ल बख्शे नइ जाही। पीड़ित कुटुंब ल हर संभव सहायता दे जाही। मुख्यमंत्री ह आज इहां अपन निवास कार्यालय म खल्लारी क्षेत्र के विधायक श्री चुन्नीलाल साहू के नेतृत्व म आए बागबाहरा के नागरिक मन के प्रतिनिधि मंडल ल ये वाले आश्वासन दीन। श्री साहू के संग राजपूत क्षत्रिय समाज बागबाहरा के अध्यक्ष श्री देवीसिंह ठाकुर अऊ आन सदस्य घलोक मौजूद रहिन। प्रतिनिधि मंडल ह मुख्यमंत्री ल बताइस कि श्री वेणुधर सिंह के करीबन एक हफ्ता पहिली अज्ञात मनखे ह हत्या कर दे रहिस। श्री वेणुधर सिंह बागबाहरा के रेल्वे मालधक्का तीर फुलवारी पारा म एक मकान म रहत रहिन अऊ इलाका के हाट-बाजार मन म घूम-घूमके कपड़ा बेचत रहिस। मुख्यमंत्री ह कहिन कि पुलिस ल ए मामला के पूरा गंभीरता अऊ तत्परता ले जांच करे के निर्देश दिए जाही। पीड़ित कुटुंब ल न्याय देवाए जाही। उमन पीड़ित कुटुंब के प्रति अपन संवेदना प्रकट करिन।