छत्तीसगढ़ के छत्तीस पत्रकार मन उपर केन्द्रित पुस्तक : मुख्यमंत्री ह करिस ’हमारे पुरोधा’ के विमोचन

प्रदेश म पत्रकारिता के गौरवशाली इतिहास: डॉ. रमन सिंह

रायपुर, 13 सितम्‍बर 2017। मुख्यमंत्री डॉ. रमन सिंह ह आज संझा इहां अपन निवास म छत्तीसगढ़ के छत्तीस वरिष्ठ पत्रकार मन के जीवन परिचय उपर आधारित पुस्तक ’छत्तीसगढ़ के पत्रकारिता हमारे पुरोधा’ के विमोचन करिस। डॉ. सिंह ह विमोचन के संक्षिप्त अऊ सादगीपूर्ण कार्यक्रम ल सम्बोधित करत पुस्तक के लेखक श्री परितोष चक्रवर्ती ल बधाई अऊ शुभकामना दीन।

डॉ. सिंह ह कहिन – राज्य म पत्रकारिता के गौरवशाली इतिहास एक सौ साल ले घलोक जादा जुन्ना हे। उमन प्रदेश म पत्रकारिता के जनक स्वर्गीय श्री माधवराव सप्रे अऊ ऊंखर सहयोगी स्वर्गीय श्री रामराव चिंचोलकर कोति ले साल 1900 म पेण्ड्रा ले प्रकाशित मासिक पत्रिका छत्तीसगढ़ मित्र के विशेष रूप ले उल्लेख करिन। डॉ. रमन सिंह ह स्वतंत्रता आंदोलन अऊ राज्य अउ देश के विकास म छत्तीसगढ़ के ए वरिष्ठ पत्रकार मन के योगदान के प्रशंसा करिन। उमन कहिन- इन मन ले कई पत्रकार मन ह साहित्य के क्षेत्र म घलोक अपन विशेष पहिचान बनाय हे। मुख्यमंत्री ह कहिन- लेखक श्री चक्रवर्ती ह बड़ मेहनत ले जऊन प्रमुख पत्रकार मन के जीवन परिचय ए पुस्तक म संकलित करे हें, वो मनखे मन ह पत्रकारिता के संग देश, प्रदेश अऊ समाज ल अपन मूल्यवान सेवा देहे हें अऊ ओमां ले कई वरिष्ठ पत्रकार आज घलोक लेखन अऊ पत्रकारिता के क्षेत्र म सक्रिय हें।
विमोचन समारोह ल छत्तीसगढ़ राज्य अल्पसंख्यक आयोग के अध्यक्ष श्री सुरेन्द्र सिंह कैम्बो, वरिष्ठ पत्रकार अऊ छत्तीसगढ़ हिन्दी ग्रंथ अकादमी के पहिली निदेशक श्री रमेश नैयर अऊ साहित्यकार श्री सुधीर शर्मा ह घलोक सम्बोधित करिन। लेखक श्री परितोष चक्रवर्ती ह पुस्तक के विषयवस्तु उपर प्रकाश डालिन। विमोचन समारोह म वरिष्ठ पत्रकार श्री गोविंदलाल वोरा, वरिष्ठ लेखक अऊ पूर्व राज्य निर्वाचन आयुक्त डॉ. सुशील त्रिवेदी अउ छत्तीसगढ़ साहित्य अकादमी के कार्यकारी अध्यक्ष प्रोफेसर रमेन्द्रनाथ मिश्र घलोक उपस्थित रहिन।

हम आप ल बता दन कि ए पुस्तक म पंडित माधवराव सप्रे, पंडित रविशंकर शुक्ल, बैरिस्टर ठाकुर छेदीलाल, पदुमलाल पुन्नालाल बख्शी, कुलदीप सहाय, यदुनंदन प्रसाद श्रीवास्तव, केशव प्रसाद वर्मा, बारीन्द्रनाथ बैनर्जी, पंडित रामाश्रय उपाध्याय, पंडित स्वराज्य प्रसाद त्रिवेदी, पंडित शिव नारायण द्विवेदी, चंदूलाल चंद्राकर, मायाराम सुरजन, हरि ठाकुर, मधुकर खेर, केशवलाल मेहता, कुमार साहू, श्रीकांत वर्मा, द्वारिका प्रसाद चौबे, रम्मू श्रीवास्तव, किरीट दोषी, बसंत अवस्थी, सत्येंद गुमास्ता, बिसाहूराम यादव, राजनारायण मिश्रा, बसंत कुमार तिवारी, शरद कोठारी, श्यामलाल चतुर्वेदी, गोविंदलाल वोरा, गुरूदेव काश्यप, तुषार कांति बोस, जयशंकर शर्मा ’नीरव’, बबन प्रसाद मिश्रा, रमेश नैयर अऊ ललित सुरजन के जीवन परिचय संकलित हे। ये किताब ल रायपुर के वैभव प्रकाशन ह प्रकाशित करे हे।