बहुत जल्दी बस्तर ह जुड़ही घरेलू विमान सेवा ले: डॉ. रमन सिंह

मुख्यमंत्री ले मिले ल पहुंचिन बस्तर के पांच सौ ले जादा पंच-सरपंच

रायपुर, 24 सितम्‍बर 2017। मुख्यमंत्री डॉ रमन सिंह ह आज संझा इहां अपन निवास परिसर म बस्तर संभाग के चार जिला -कोण्डागांव, बस्तर (जगदलपुर) कांकेर अऊ नारायणपुर के 500 ले जादा पंच-सरपंच मन के आत्मीय स्वागत करिन। उमन पंच-सरपंच मन ले ऊंखर गांव, घर-परिवार, गांव वाले मन के खेती-किसानी, लइका मन के शिक्षा अऊ गांव मन के आन बुनियादी सुविधा मन के बारे म जानकारी लीन।
हमर छत्तीसगढ़ योजना के अंतर्गत रायपुर अऊ नवा रायपुर के भ्रमण म आए ए पंचायत प्रतिनिधि मन ल सम्बोधित करत मुख्यमंत्री ह कहिन -राज्य सरकार के ये प्रयास हे कि बस्तर राजस्व संभाग के मुख्यालय जगदलपुर बहुत जल्दी घरेलू विमान सेवा ले जुड़ जाही। अवइया कुछ महीना म रायपुर-जगदलपुर-विशाखापट्नम बर ये सेवा शुरू हो जाही। एखर से बस्तरवासी मन ल काफी सहोलियत होही। गंभीर बीमार मरीज मन ल रायपुर अऊ विशाखापट्नम के बड़े अस्पताल मन म जल्दी ले जल्दी इलाज बर ले जाए जा सकही। मुख्यमंत्री ले सौजन्य मुलाकात के बेरा पंच-सरपंच मन ह धान बोनस के घोषणा म ऊंखर प्रति आभार प्रकट करिन। लोकसभा संसद श्री दिनेश कश्यप अऊ पूर्व विधायक श्री बैदू राम कश्यप घलोक ए अवसर म उपस्थित रहिन।
मुख्यमंत्री ह पंचायत प्रतिनिधि मन ले बस्तर ल विकसित, शिक्षित, स्वच्छ अऊ समृद्ध बनाए के आव्हान करिन। उमन कहिन कि बस्तर म शिक्षा, स्वास्थ्य, सड़क, बिजली, रेल, मोबाइल कनेक्टिविटी जैसे सुविधा देहे के सरलग उदीम करे जात हे। ए क्षेत्र के मनखे मन म जागरूकता आवत हे। ओ मन घलोक विकास के मुख्यधारा म सामिल होना चाहत हें। बस्तर संभाग के सबो सात जिला मन म स्थानीय युवा मन ल लाईवलीहुड कॉलेज मन म कौशल उन्नयन के प्रशिक्षण देहे जात हे अऊ ओ मन ल स्व-रोजगार ले घलोक जोड़े जात हे। डॉ. सिंह ह कहिन – बस्तर म बहुत जल्दी खुशहाली आही। लोकसभा संसद श्री दिनेश कश्यप अऊ पूर्व विधायक श्री बैदू राम कश्यप ह घलोक पंचायत प्रतिनिधि मन ल सम्बोधित करिन।