केन्द्र सरकार के मुद्रा प्रोत्साहन अभियान के तैयारी शुरू

राजधानी रायपुर म तीन अकटूबर के दिन वित्तीय समावेशन शिविर
आयोजन बर मुख्य सचिव के अध्यक्षता म वरिष्ठ अधिकारी मन के बैठक

रायपुर, 25 सितम्‍बर 2017। राज्य सरकार कोति ले पंडित दीनदयाल उपाध्याय जन्म शताब्दी साल अऊ केन्द्र सरकार के मुद्रा प्रोत्साहन अभियान के तहत राजधानी रायपुर म अवइया महीना के तीन तारीक के दिन वित्तीय समावेशन शिविर लगाए जाही। ये शिविर स्थानीय अग्रसेन धाम के विशाल सभाकक्ष म आयोजित करे जाही। मुख्य सचिव श्री विवेक ढांड ह आज इहां मंत्रालय (महानदी भवन) म संबंधित विभाग मन अऊ बैंक मन के वरिष्ठ अधिकारी मन के बैठक लेके शिविर के तैयारी के समीक्षा करिन। राज्य स्तरीय बैंकर्स समिति के प्रतिनिधि मन ह बैठक म बताइन कि शिविर म सबो बैंक मन के स्टॉल लगाए जाही, जहां आवेदक मन के प्रधानमंत्री मुद्रा योजना के तहत ऋण स्वीकृति के प्रक्रिया सुनिश्चित करे जाही। एखर अंतर्गत ओ मन ल कई ठन व्यवसाय मन बर मौकाच म करजा देवाए के उदीम करे जाही। प्रधानमंत्री मुद्रा योजना म प्रदेश के सफल हितग्राही मन ल, जेमन अपन कारोबार म कैशलेस लेन-देन शुरू कर देहे हे अऊ जऊन एखर खातिर भारत सरकार के ‘भीम एप्प’ के उपयोग करत हे, ओ मन ल घलोक शिविर म आमंत्रित करे जाही। राज्य अऊ केन्द्र सरकार के कई ठन हितग्राहीमूलक ऋण योजना मन के बारे म मनखे मन ल जानकारी दे जाही। राजधानी रायपुर अऊ जिला मुख्यालय दन्तेवाड़ा म बैंक मन कोति ले फाइनेंस करे ई-रिक्शा मन के सफलता ल देखत तीन अकटूबर के दिन रायपुर शिविर म जादा ले जादा संख्या म ई-रिक्शा फाइनेंस करे के घलोक प्रयास होही। एखर अलावा मनखे मन ल प्रधानमंत्री जीवन ज्योति बीमा योजना, प्रधानमंत्री सुरक्षा बीमा योजना अऊ आन योजना मन के बारे म घलोक बताए जाही। मुख्य सचिव श्री विवेक ढांड ह अधिकारी मन ले कहिन कि शिविर म जनप्रतिनिधि मन अऊ चेम्बर ऑफ कॉमर्स के प्रतिनिधि मन ल विशेष रूप ले आमंत्रित करे जाए। शिविर के तैयारी बैठक म वित्त विभाग के प्रमुख सचिव श्री अमिताभ जैन, संचालक, संस्थागत वित्त डॉ. कमलप्रीत सिंह, कलेक्टर श्री ओ.पी. चौधरी, भारतीय स्टेट बैंक (छत्तीसगढ़ अऊ मध्यप्रदेश) के मुख्य महाप्रबंधक श्री के.टी. अजीत अऊ राष्ट्रीय कृषि अउर ग्रामीण विकास बैंक (नाबार्ड) भारतीय जीवन बीमा निगम अउर आन संबंधित संस्था मन अऊ विभाग मन के वरिष्ठ अधिकारी उपस्थित रहिन।