केन्द्रीय विश्वविद्यालय बिलासपुर के पढ़ईया लईका मन के दल गुजरात रवाना

एक भारत-श्रेष्ठ भारत योजना

रायपुर, 25 सितम्‍बर 2017। एक भारत-श्रेष्ठ भारत योजना के अंतर्गत स्टूडेंट एक्सचेंज प्रोग्राम के तहत गुरू घासीदास केन्द्रीय विश्वविद्यालय बिलासपुर के छात्र-छात्रा मन के दल आज बिलासपुर ले गुजरात बर रवाना होइस। दल के युवा सात दिन के गुजरात प्रवास के समय उहां कई ठन शैक्षणिक गतिविधि मन म हिस्सा जिहीं। ओ मन ल गुजरात के कला-संस्कृति अऊ शिक्षा के सुविधा मन ल देखे-समझे के अवसर मिलही। ए पढ़ईया लईका मन ल गुजरात के गौरवशाली इतिहास के जानकारी देहे उहां के ऐतिहासिक अऊ पुरातात्विक महत्व के स्थल मन के भ्रमण कराए जाही। गुजरात के पारंपरिक लोक कला मन ल सीखे के मौका घलोक ए दौरान छात्र-छात्रा मन ल मिलही।
आप मन जानतेच हव कि केन्द्र सरकार के एक भारत-श्रेष्ठ भारत योजना के तहत छत्तीसगढ़ अऊ गुजरात के जोड़ी बनाए गए हे। अभी हाल म ए दुनों राज्य मन के कलाकार एक-दूसर राज्य मन म जाके कार्यक्रम प्रस्तुत करत हें। दुनों राज्य मन के लोक खेल के खिलाड़ी ल एक-दूसर राज्य मन म जाके अपन प्रतिभा के प्रदर्शन करे के मौका मिलत हे। गुजरात के अहमदाबाद म चलत नवरात्रि अउर गरबा महोत्सव म छत्तीसगढ़ के बस्तर अऊ सरगुजा क्षेत्र के कलाकार मन के हर संझा अहमदाबाद के मुख्य गरबा मैदान म लोक नृत्य अऊ गीत के कार्यक्रम प्रस्तुत करे के सिलसिला चलत हे।