वृद्धाश्रम मन म सियान मन ल मिलही घर जइसे सुविधा

समाज कल्याण सचिव श्री बोरा ह माना स्थित नवीन वृद्धाश्रम के करिस निरीक्षण

समाज कल्याण विभाग के सचिव श्री सोनमणि बोरा ह ए हप्‍ता रईपुर के माना स्थित नवीन वृद्धाश्रम भवन ’परमाश्रय’ के निरीक्षण करिस। श्री बोरा ह ए आश्रम के निरीक्षण के समय इहां के सुविधा मन के समीक्षा करत कहिन कि बहुत जल्दी ए आश्रम भवन के विस्तार करे जाही। समाज कल्याण विभाग कोति ले इहां सियान मन ल हर सुविधा देवाए जाही। अभी हाल म ए भवन म 96 सियान मन के रहे के सुविधा हे, जऊन ल 500 सियान मन के रहे के लइक बनाए जाही। संगेंच श्री बोरा ह ए भवन म सियान मन के मनोरंजन बर एक्टीविटी सेंटर, ऊंखर परिजन म न के रूके बर गेस्ट हाउस अऊ दिन के समय म सियान मन के देखभाल बर डे केयर सेंटर के निर्माण के बात घलोक कहिन। उमन कहिन कि समाज कल्याण विभाग कोति ले वृद्धाश्रम मन म सियान मन ल घर जइसे सुविधा देहे बर उदीम करे जात हे। उमन ये घलोक बताइन कि माना क्षेत्र म समाज कल्याण विभाग के तरफ ले दिव्यांग, निराश्रित अऊ सियान मन बर बहुत अकन संस्था संचालित करे जात हे। राज्य सरकार के कार्ययोजना हे कि ए क्षेत्र ल ए प्रकार विकसित करे जाए कि एला समाज कल्याण के क्षेत्र म राष्ट्रीय स्तर के पहिचान मिलय।



उमन बताइन कि समाज कल्याण कोति ले दिव्यांगजन मन बर इहां म ’घरौंदा’ नाम के आश्रय स्थल के निर्माण करे हे, जऊन ल दू महीना के भीतर शुरू करे जाही। ’घरौंदा’ म 18 साल ले जादा आयु के दिव्यांगजन मन के सम्पूर्ण देखभाल जीवन पर्यन्त करे जाही। समाज कल्याण विभाग कोति ले घरौंदा म दिव्यांगजन मन के देखभाल, भरण पोषण, चिकित्सा के सम्पूर्ण व्यवस्था करे जात हे। उमन कहिन कि अवइया समें ल देखत समाज कल्याण विभाग कोति ले डे केयर सेंटर मने बहुसेवा केन्द्र मन के स्थापना म विशेष रूचि लेहे जात हे, ताकि सियान मन ल एकर लाभ मिल सकय। अवइया कुछ साल म सियान मन के संख्या म बढ़ोत्तरी होही, ए लिहाज ले अवइया समय म डे-केयर सेंटर के जरूरत परही, जिहां उंखर देखभाल करे जा सकही। आप मन जानतेच होहू कि माना स्थित ए वृद्धाश्रम भवन के निर्माण एयरपोर्ट अथॉरिटी ऑफ इंडिया कोति ले करे गए हे, जेखर संचालन समाज कल्याण विभाग कोति ले एक निजी समाज सेवी संस्था श्री मानव सेवा संस्थान संग मिलके करही।