मुख्यमंत्री ह चिकित्सक मन ल ’स्वास्थ्य रत्न’ ले करिस सम्मानित

डॉ. रमन सिंह हेल्थ समिट म सामिल

मुख्यमंत्री डॉ. रमन सिंह ह 29 सितम्‍बर के रात ’हेल्थ समिट’ कार्यक्रम म सामिल होइन। कार्यक्रम के आयोजन निजी टी.व्ही. चैनल जी टी.व्ही. (छत्तीसगढ़-मध्यप्रदेश) के संग करिस। ए अवसर म मुख्यमंत्री ह चिकित्सा के क्षेत्र म उल्लेखनीय उपलब्धि हासिल करइया चिकित्सक मन ल ’स्वास्थ्य रत्न’ ले सम्मानित करिस। उमन मुख्य अतिथि के आसंदी ले सम्बोधित करत कहिन कि छत्तीसगढ़ स्वास्थ्य के क्षेत्र म निरंतर प्रगति करत हे। आज सबो जिला मुख्यालय म जिला अस्पताल खुल गे हे। बस्तर जइसे सुदूर क्षेत्र मन म चिकित्सा के आधारभूत सुविधा देवाए गए हे। उहां मुख्यमंत्री स्वास्थ्य फेलोशिप योजना के तहत विशेषज्ञ चिकित्सक मन के नियुक्ति करे गए हे, जेखर से दंतेवाड़ा, बीजापुर, सुकमा म बड़े-बड़े बीमारी मन के इलाज जइसे किडनी के डायलिसिस घलोक करे जात हे। उमन कहिन -स्वास्थ्य ल अच्छा रखे बर नियमित रूप ले पैदल चलव अऊ व्यायाम करव। मैं खुदे रोज सात ले आठ हजार कदम पैदल चले के उदीम करथंव। ये डायबिटिज अऊ ब्लड प्रेसर ले दूर रहे के सबले अच्छा तरीका हे।
डॉ. सिंह ह कहिन कि छत्तीसगढ़ राज्य निर्माण होइस, त हमार आघू मातृ मृत्युदर, शिशु मृत्यु दर के चुनौती रहिस, फेर आज इहां एकर दर अड़बड़ कम हो गए हे। उमन कहिन -हमन मितानिन मन के नियुक्ति करेन, जऊन ल पूरा देशभर म ’आशा’ के मॉडल के रूप म अपनाए गीस। संगेच कई नर्सिंग कॉलेज खोले गीस, जेखर माध्यम ले अस्पताल मन म प्रशिक्षित नर्सिंग स्टाफ के नियुक्ति करे गीस। एखर कारण प्रदेश म संस्थागत प्रसव म तेजी ले वृद्धि होइस हे। मुख्यमंत्री ह कहिन कि कैंसर जइसे बड़े बीमारी मन के इलाज बर प्रदेश के राजधानी म डॉ. भीमराव अम्बेडकर अस्पताल म उच्‍च स्तरीय सुविधा हे, जेमां आसपास के राज्य मन ले घलोक इलाज बर मरीज आथें। राज्य सरकार कोति ले लइका मन के हृदय के इलाज बर मुख्यमंत्री बाल हृदय योजना शुरू करे गए हे, जेखर ले हर साल कई लइका मन ल लाभ होवत हे। आज भिनसरहा मैं ह ए योजना के लाभान्वित लइका मन ले बात करेंव।



मुख्यमंत्री ह कहिन कि स्वच्छता ले स्वास्थ अऊ स्वास्थ ले समृद्ध छत्तीसगढ़ के निर्माण होही। राज्य सरकार कोति ले एखर बर सरलग उदीम करे जात हे। अब तक 60-70 फीसदी ले जादा ग्राम-शहर खुले म शौचमुक्त हो गे हे अऊ दू अकटूबर 2018 तक पूरा प्रदेश खुले म शौचमुक्त हो जाही। कार्यक्रम म महिला अउ बाल विकास मंत्री श्रीमती रमशीला साहू, छत्तीसगढ़ औद्योगिक विकास निगम के अध्यक्ष श्री छगन मूंदड़ा अऊ जी टी.व्ही. (छत्तीसगढ़-मध्यप्रदेश) के सम्पादक श्री दिलीप तिवारी संग आन जनप्रतिनिधि, चिकित्सकगण अऊ नागरिक उपस्थित रहिन।