गरीबी-अशिक्षा संग जम्‍मो बुराई मन ले मुक्‍त करा के नवा छत्तीसगढ़ के निर्माण करबो : डॉ. रमन सिंह

विजयादशमी समारोह म सामिल मुख्यमंत्री
आकर्षक आतिशबाजी के संग होइस रावण, कुम्भकर्ण अऊ मेघनाथ के पुतला मन के दहन

विजयादशमी, दसेरा के बेरा म छत्तीसगढ़ के राजधानी रायपुर के डब्ल्यू. आर. एस. कालोनी म आयोजित दशहरा उत्सव म रावण, कुम्भकरण अऊ मेघनाथ के विशाल पुतला मन के दहन करिस। कार्यक्रम म मुख्यमंत्री डॉ. रमन सिंह, मुख्यमंत्री के धर्मपत्नी श्रीमती वीणा सिंह, लोकसभा सांसद श्री रमेश बैस, लोक निर्माण मंत्री श्री राजेश मूणत, पाठ्यपुस्तक निगम के अध्यक्ष श्री देवजी भाई पटेल, विधायक श्री श्रीचंद सुंदारानी, छत्तीसगढ़ औद्योगिक वित विकास निगम के अध्यक्ष श्री छगन मुंदड़ा, नगर निगम रायपुर के सभापति श्री प्रफुल्ल विश्वकर्मा अऊ रेल्वे मंडल के महाप्रबंधक श्री राहुल गौतम संग आन जनप्रतिनिधि समारोह म उपस्थित रहिन। ए अवसर म आकर्षक आतिशबाजी, लेजर शो अऊ रामायण कथा म आधारित थ्रीडी फिल्म के एलईडी म प्रस्तुतिकरण करिस।



समारोह ल सम्बोधित करत मुख्यमंत्री डॉ. रमन सिंह ह प्रदेशवासि मन ल विजयादशमी के शुभकामना दीन। उमन कहिन कि हिन्दुस्तान म अइसन कम जघा हे, जिहां विजयादशमी के अतका अच्छा आयोजन होथे। एखर बर इहां के आयोजक मन बधाई के पात्र हें। उमन कहिन भगवान राम ह अहंकार रूपी रावण के वध करे रहिन। ए अवसर म विजयादशमी के उत्सव मनाया जाथे, जऊन प्रकार ले श्री राम ह बुराई के चिनहा रावण ल पराजित करिस, ठीक वइसनहे हमला देश म व्याप्त समस्या, विशेष रूप ले आतंकवाद अऊ नक्सलवाद उपर विजय पाय के जरूरत हे। मुख्यमंत्री ह कहिन छत्तीसगढ़ भगवान श्रीराम के ननिहाल ये, ते खातिर प्रदेश म सुख अऊ समृद्धि हे अऊ छत्तीसगढ़ सरलग प्रगति के रद्दा म आगू बढ़त हे। उमन प्रदेश के जनता ले आव्हान करिन कि हम सब संकल्प लेवन कि प्रदेश ल गरीबी, अशिक्षा संग जम्‍मो बुराई ले मुक्‍त कराबोन अऊ नवा छत्तीसगढ़ के निर्माण करबोन। कार्यक्रम ल लोकसभा सांसद श्री रमेश बैस अऊ लोकनिर्माण मंत्री श्री राजेश मूणत ह घलोक सम्बोधित करिन।