बोनस तिहार 2017 बिलासपुर: मुख्यमंत्री के हाथ 74 हजार ले जादा किसान मन ल करीबन 115 करोड़ के धान बोनस

मुख्यमंत्री डॉ. रमन सिंह ह ए हप्‍ता के तीन तारीख के दिन मंझनिया जिला मुख्यालय बिलासपुर के विज्ञान महाविद्यालय मैदान म आयोजित ’बोनस तिहार’ म जिला के 74 हजार 500 किसान मन ल 114 करोड़ 73 लाख रूपिया के धान बोनस के ऑनलाईन वितरण करत चिनहा स्वरूप कई किसान मन ल बोनस के प्रमाण पत्र घलोक संउपिन। ये राशि किसान मन ल साल 2016 म सहकारी समिति मन म ऊंखर कोति ले बेचे गए धान बर 300 रूपिया प्रति क्विंटल के हिसाब ले देहे गइस। मुख्यमंत्री ह लैपटाप म एक किलिक के संग 114 करोड़ 73 लाख रूपिया के पूरा राशि सहकारी समिति मन के सदस्य किसान मन के खाता मन म हस्तांतरित कर दीन। ए अवसर म कृषि अऊ जल संसाधन मंत्री श्री बृजमोहन अग्रवाल, खाद्य अउ नागरिक आपूर्ति मंत्री श्री पुन्नूलाल मोहले, नगरीय प्रशासन अऊ विकास मंत्री श्री अमर अग्रवाल, पंचायत अऊ ग्रामीण विकास मंत्री श्री अजय चंद्राकर, सहकारिता पर्यटन अऊ संस्कृति मंत्री श्री दयालदास बघेल, लोकसभा सांसद श्री लखनलाल साहू, पूर्व विधानसभा अध्यक्ष श्री धरमलाल कौशिक अऊ गृह निर्माण मंडल के अध्यक्ष श्री भूपेन्द्र सवन्नी संग कई ठन संस्था मन के पदाधिकारी, बहुत अकन वरिष्ठ जनप्रतिनिधि अऊ हजारों के संख्या म किसान अउर नागरिक उपस्थित रहिन। डॉ. सिंह ह कार्यक्रम म बिलासपुर जिला के विकास बर करीबन 247 करोड़ के कई ठन निर्माण काम मन के लोकार्पण, भूमिपूजन अऊ शिलान्यास करिन।