वित्त आयोग के सर्वदलीय गोठ राजनीतिक दल मन के प्रतिनिधि मन ले विचार-विमर्श

पंचायत मन अऊ नगरीय निकाय मन के आर्थिक सशक्तिकरण के उपाय मन उपर बातचीत छत्तीसगढ़ राज्य वित्त आयोग के अध्यक्ष श्री चन्द्रशेखर साहू के अध्यक्षता म ए हप्‍ता के नौ तारीख के दिन इहां टैगोर नगर स्थित आयोग के कार्यालय म सर्वदलीय गोठ के आयोजन करे गीस। येमां प्रदेश शहरी निकाय मन संग तीन स्तर वाले पंचायत मन ल आर्थिक रूप ले सशक्त बनाए बर सुझाव प्राप्त करे गीस। ये अवसर म श्री चन्द्रशेखर साहू ह कहिन कि आयोग कोति ले राज्य सरकार ल भेजइया जाय अपन प्रतिवेदन म ए सुझाव मन ल घलोक सामिल करे जाही।

आयोग अपन प्रतिवेदन राज्य सरकार ल जनवरी 2018 म प्रस्तुत करही। ये दिन के सर्वदलीय गोठ म राज्य वित्त आयोग के सदस्य श्री नरेश चन्द्र गुप्ता, सचिव श्री भरत अग्रवाल, भारतीय जनता पार्टी के प्रदेश उपाध्यक्ष श्री सुनील सोनी, प्रदेश महामंत्री श्री संतोष पाण्डेय, शिवसेना के प्रदेश प्रमुख श्री धनंजय सिंह परिहार अऊ श्री एच.एन. सिंह, भारतीय कम्युनिस्ट पार्टी (मार्क्सवादी) के श्री एम.के नंदी अऊ राज्य सचिव श्री संजय पराते, आम आदमी पार्टी के संयोजक श्री संकेत ठाकुर अऊ सचिव श्री उत्तम जायसवाल अउर राष्ट्रवादी कांग्रेस पार्टी (एनसीपी) के प्रदेश अध्यक्ष श्री सतीश जग्गी घलोक उपस्थित रहिन। सर्वदलीय गोठ म आयोग कोति ले प्रस्तुत कार्यसूची के अनुसार कई ठन बिन्दु म विस्तृत चर्चा करे गइस। ये मां राजस्व वृद्धि ल प्रोत्साहन देहे, स्थानीय निकाय मन के वित्तीय प्रबंधन के क्षमता बढ़ाए, राज्य कोति ले लेवइया कर, शुल्क, रस्ता के कर मन के राज्य अऊ स्थानीय निकाय मन के बीच वितरण, राज्य के संचित निधि म ले पंचायत मन अऊ नगर पालिका मन ल सहायता अनुदान जइसे कई विषय मन म विचार के आदान-प्रदान होइस।




वित्त आयोग के अध्यक्ष श्री चन्द्रशेखर साहू ह सर्वदलीय गोठ म बताइस कि छत्तीसगढ़ शासन कोति ले भारतीय संविधान के अनुच्छेद 243 (झ) अऊ 243 (म) के अनुसार गठित ये तीसरा राज्य वित्त आयोग हे। एकर गठन जनवरी 2016 म करे गए रहिस। आयोग कोति ले प्रदेश के दस हजार 971 ग्राम पंचायत मन, 146 जनपद पंचायत मन, 27 जिला पंचायत मन, 13 नगर निगम मन, 44 नगर पालिका मन अऊ 111 नगर पंचायत मन के आर्थिक सशक्तिकरण बर ए संस्था मन ल अलग-अलग प्रश्नावली भेजे गए रहिस। उंखर कोति ले मिले सुझाव मन ल घलोक कम्प्यूटर म दर्ज करे जात हे। प्रदेश के सांसद, विधायक, कई ठन निगम मंडल अऊ आयोग मनके अध्यक्ष मन ले घलोक सुझाव लेहे गए हे। आयोग ह नई दिल्ली म छत्तीसगढ़ के सांसद मन ल बैठक म आमंत्रित करके उंखर कोति ले विस्तृत विचार-विमर्श घलोक करे गीस। एखर अलावा प्रदेश के नगरीय निकाय मन के महापौर, अध्यक्ष अऊ आयुक्त अउर मुख्य नगर पालिका अधिकारी मन के कार्यशाला घलोक आयोजित करे गए रहिस। श्री साहू ह सर्वदलीय गोठ म बताइस कि आयोग कोति ले प्रदेश के सबो पांच संभाग म आयोग के पदाधिकारी मन ह पंचायतीराज संस्था मन अउर स्थानीय नगरीय निकाय मन के जनप्रतिनिधि मन अऊ मैदानी अधिकारी मन के संग बैठक करके विस्तृत समीक्षा करे हें।

आयोग ह गुजरात, राजस्थान, हरियाणा, उत्तराखण्ड अऊ आंध्रप्रदेश जाके उहां के राज्य वित्त आयोग मन के कार्यप्रणाली के घलोक अध्ययन करे गए हे। भारतीय लोक प्रशासन संस्थान नई दिल्ली के सहयोग ले रायपुर म स्थानीय निकाय मन के लोक वित्त अउर जीएसटी अभी हाल परिपेक्ष्य के विसय म कार्यशाला आयोजित करे गीस, जेमां त्रि-स्तरीय पंचायत अउर नगरीय निकाय के प्रदेश अधिकारी अउर जनप्रतिनिधि, विभागध्यक्ष, पूर्व वित्त आयोग के सदस्य, सलाहकार, प्रबुद्ध अर्थशास्त्री, वित्त पंचायत, नगरीय प्रशासन अउर विकास विभाग मन के अधिकारी सामिल होइन।