राष्ट्रीय एग्री यूनिफेस्ट: इंदिरा गांधी कृषि विश्वविद्यालय के छात्र-छात्रा मन ह पंथी नृत्य म जीतिन गोल्ड मेडल

इंदिरा गांधी कृषि विश्वविद्यालय रायपुर के छात्र-छात्रा मन ह राष्ट्रीय एग्री यूनिफेस्ट म पंथी प्रस्तुत करके स्वर्ण पदक जीतिन। राष्ट्रीय एग्री यूनिफेस्ट-2017 के आयोजन राजस्थान के बीकानेर म करे गीस। ये मां देश भर के 54 कृषि विश्वविद्यालयों के छात्र-छात्रा मन ह हिस्सा लीन। इंदिरा गांधी कृषि विश्वविद्यालय के छात्र-छात्रा मन के सांस्कृतिक दल ह यूनिफेस्ट म मनमोहक पंथी नृत्य पेश करे रहिन। जऊन ल उहां उपस्थित दर्शक मन के खूब सराहना मिलीस। विश्वविद्यालय के ए टीम के उत्कृष्ट प्रस्तुति म ओ मन ल गोल्ड मेडल ले नवाजे गीस। गोल्ड मेडल पवइया सांस्कृतिक टीम म छात्र श्री पुनदास जोशी, श्री फलेन्द्र भास्कर, श्री मनोज देवांगन, श्री किशोर पात्रे, श्री महेश डाहिरे, श्री सोमेश कुर्रे, छात्रा कुमारी अल्का मिंज, कुमारी उतरा साहू, कुमारी हिमांशी वर्मा, कुमारी निधि साहू, अउर कुमारी पार्वती कार्कि सामिल रहिन। इंदिरा गांधी कृषि विश्वविद्यालय के सांस्कृतिक समन्वयक डॉ. बी.पी.कतलम, महिला टीम मैनेजर डॉ. दीप्ति पटेल अउर डॉ. सुनील नाग घलोक सांस्कृतिक दल के संग बीकानेर गए रहिन। कृषि विश्वविद्यालय के कुलपति डॉ. एस के पाटिल अऊ कृषि विश्वविद्यालय के अधिष्ठाता छात्र कल्याण डॉ. (मेजर) जी. के. श्रीवास्तव ह गोल्ड मेडल जीतइया छात्र-छात्रा मन ल बधाई अउ शुभकामना देहे हें।