छत्तीसगढ़ देश के विकसित, समृद्ध अउ खुशहाल राज्य बनही – कृषि मंत्री श्री बृजमोहन अग्रवाल

राज्योत्सव म रंगारंग सांस्कृतिक कार्यक्रम आयोजित

रायपुर 04 नवम्बर 2017। कृषि मंत्री श्री बृजमोहन अग्रवाल ह कहिस कि छत्तीसगढ़ ह राज्य गठन के सतरा बछर म तेजी से विकास करे हे। छत्तीसगढ़ देश के विकसित, समृद्ध अउ खुसहाल राज्य बनही। एला साकार करे बर मुख्यमंत्री डॉ. रमन सिंह चउदा साल ले सरलग काम करत हें। श्री अग्रवाल काल जिला मुख्यालय बालोद के सरदार पटेल मैदान म आयोजित जिला स्तरीय एक दिन के राज्योत्सव म मुख्य अतिथि के आसंदी ले समारोह ल सम्बोधित करत रहिन। श्री अग्रवाल बालोद जिला के प्रभारी मंत्री हवंय। ये अवसर म रंगारंग सांस्कृतिक कार्यक्रम मन के प्रस्तुति होइस।
प्रभारी मंत्री श्री अग्रवाल ह बालोद जिलेवासी मन ल राज्योत्सव के बधाई अउ शुभकामना देत कहिन कि पूर्व प्रधानमंत्री श्री अटल बिहारी वाजपेयी ह छत्तीसगढ़ राज्य के गठन करे रहिस। राज्य निर्माण के बाद ले छत्तीसगढ़ के नाम देश अउ दुनिया म फइले हे। छत्तीसगढ़ राज्य बने के बाद गॉव-गॉव म पक्का सड़क बने हे। प्रदेश म सात हजार स्कूल रहिस, अब साठ हजार स्कूल हे। सिंचाई के प्रतिसत पहिली 23 प्रतिसत रहिस, जउन बाढ़के अब 34 प्रतिसत हो गए हे। प्रदेश म खाद बीज की कमी नइ हे। उमन कहिन कि सबला मिलजुलके बालोद ल उन्नत अउ विकसित जिला बनाना हे। एकर पहिली मंत्री श्री अग्रवाल ह मॉ सरस्वती के छायाचित्र म माल्यार्पण अउ दीप प्रज्वलित करके राज्योत्सव के शुभारंभ करिस। कलेक्टर डॉ. सारांश मित्तर ह प्रतिवेदन प्रस्तुत करिस। ये अवसर म गुण्डरदेही विधायक श्री राजेन्द्र राय, जिला सहकारी केन्द्रीय बैंक दुर्ग के अध्यक्ष श्री प्रीतपाल बेलचंदन, पूर्व विधायक श्री प्रीतम साहू, श्रीमती कुमारी साहू, श्री विरेन्द्र साहू, श्री लाल महेन्द्र सिंह टेकाम अनेक जनप्रतिनिधि, कई विभाग मन के अधिकारी, कर्मचारी अउ बड़ संख्या म नागरिक मौजूद रहिन।

मंत्री श्री अग्रवाल ह करिस विकास प्रदर्शनी के अवलोकन
जिला के प्रभारी मंत्री श्री बृजमोहन अग्रवाल ह छत्तीसगढ़ राज्य स्थापना दिवस के अवसर म शासन के कइ ठन विभाग मन कोति ले राज्य शासन के जनकल्याणकारी योजना मन, कार्यक्रम मन अउ उपलब्धि मन उपर आधारित लगाए गए विकास प्रदर्शनी के अवलोकन कर जायजा लीन। छत्तीसगढ़ राज्य स्थापना दिवस समारोह के अवसर म कृषि विभाग, उद्यानिकी विभाग, पशुधन विकास विभाग, सहकारी केन्द्रीय बैंक, जिला पंचायत, आदिम जाति कल्याण विभाग, शिक्षा विभाग, जिला परियोजना लाइवलीहुड, महिला एवं बाल विकास आदि विभाग मन कोति ले विकास प्रदर्शनी लगाए गए रहिस। प्रभारी मंत्री ह प्रदर्शनी के अवलोकन के बाद शहीद परिवार मन ल साल, श्रीफल भेंट करके सम्मानित करिन।

प्रभारी मंत्री के हाथ हितग्राही होइस लाभान्वित
राज्य स्थापना दिवस समारोह के अवसर म आज प्रभारी मंत्री श्री बृजमोहन अग्रवाल के हाथ कई हितग्राही लाभान्वित होइन। प्रभारी मंत्री ह डौण्डी विकासखण्ड के ग्राम पंचायत सिंघोला के पारा सुकड़ीगुहान के 39 कमार परिवार अउ ग्राम ठेमाबुजुर्ग के दू परिवार ल वन अधिकार पत्र प्रदान करिन। ग्राम भरदा(ट) के किसान नरेन्द्र कुमार ल मल्टीक्राप थ्रेसर बर चालीस हजार रूपया के अनुदान राशि के चेक अउ ग्राम फरदफोड़ के उमाकांत ल गन्ना बीज क्रय अनुदान बर सात हजार दू सौ रूपया के अनुदान राशि के चेक प्रदान करके लाभान्वित करिन। ग्राम उमरादाह के पॉच किसान मन ल शतप्रतिशत अनुदान म चना बीज मिनीकीट प्रदान करके लाभान्वित करिस।