समर्थन मूल्य म धान-मक्का खरीदी 15 नवम्बर ले: तैयारी पूरा

रायपुर, 07 नवम्बर 2017। प्रदेश म खरीफ विपणन साल 2017-18 म समर्थन मूल्य म धान अऊ मक्का के खरीदी अवइया 15 नवम्बर ले शुरू होही। एकर बर सबो जरूरी तैयारी पूरा कर लेहे गए हे। पाछू साल के तुलना म ए साल पंजीकृत किसान मन के संख्या म एक लाख 27 हजार के वृद्धि होए हे। ये जानकारी खाद्य, नागरिक आपूर्ति अऊ उपभोक्ता संरक्षण मंत्री श्री पुन्नूलाल मोहले के अध्यक्षता म आज इहां मंत्रालय (महानदी भवन) म आयोजित बैठक म विभागीय अधिकारी मन ह दीन। बैठक म बताए गीस कि समर्थन मूल्य म धान खरीदी बर ए साल 15 लाख 78 हजार किसान मन के पंजीयन होय हे। पाछू खरीफ साल 2016-17 म पंजीकृत किसान मन के संख्या 14 लाख 51 हजार रहिस। अधिकारी मन ह बताइन कि ए साल राज्य के किसान मन ले धान के नगद अउ लिकिंग म खरीदी 15 नवम्बर 2017 ले 31 जनवरी 2018 तक करे जाही। समर्थन मूल्य म किसान मन ले मक्का के खरीदी 15 नवम्बर 2017 ले 31 मई 2018 तक करे जाही। भारत सरकार कोति ले धान कॉमन (मोटा) 1550 रूपिया अऊ धान ग्रेड-ए (पतला) 1590 रूपिया प्रति क्विंटल निरधारित करे गए हे। ए साल राज्य म 1992 केन्द्र मन म धान खरीदी करे जाही। बैठक म खाद्य विभाग के विशेष सचिव श्री मनोज सोनी अउ संयुक्त सचिव श्री जी.एस. सिकरवार उपस्थित रहिन।