देश-विदेश के जाने-माने शिक्षा संस्‍थान के सुजानिक मन सरकार बर करहीं काम

मुख्यमंत्री सुशासन फलोशिप कार्यक्रम बर उच्चस्तरीय संचालन समिति के बैठक पूरा

रायपुर, 08 नवम्बर 2017। छत्तीसगढ शासन कोति ले प्रशासनिक कार्य मन म समन्वय अउ सहयोग बर देश के युवा पेशेवर मन ल जोरे के उद्देश्य ले शुरू करे गए मुख्यमंत्री सुशासन फलोशिप कार्यक्रम बर उच्‍च स्तरीय संचालन समिति के बैठक दिनांक 07/11/2017 के दिन मुख्य सचिव श्री विवेक ढांड के अध्यक्षता म पूरा होइस। बैठक म 42 पद मन बर चुने गए फेलोज मन ल स्थान आबंटित करे गीस।




छत्तीसगढ इन्फोटेक प्रमोशन सोसायटी (चिप्स) के मुख्य कार्यपालन अधिकारी श्री एलेक्स पॉल मेनन ह प्रस्तुतीकरण देवत बताइन कि कार्यक्रम के शुभारंभ 19 जुलाई 2017 ले करे गीस। चिप्स ह रिकार्ड 66 दिन म सबो 42 पद मन बर चयन प्रक्रिया पूरा कर लेहे हे। एखर अंतर्गत चिप्स कोति ले ऑनलाईन परीक्षा, केस स्टडी अउ साक्षात्कार के माध्यम ले 59 पेशेवर मन के चयन करे गीस। 13 पेशेवर मन ल प्रतिक्षा सूची म रखे गए हे। श्री एलेक्स पॉल मेनन ह बताइस कि 42 पद मन बर कुल 4628 आवेदन प्राप्त होए रहिस हे। एमां आईआईएम ले 412, आईआईटी ले 131, आईएसबी ले 38, एक्सएलआरआई ले 38 अऊ कार्नेगी मेलॉन यूनिवर्सिटी, हार्वर्ड बिजनेस स्कूल, लंदन स्कूल ऑफ़ बिज़नेस, न्यू साउथ वेल्स यूनिवर्सिटी ऑस्ट्रेलिया, ऑक्सफ़ोर्ड यूनिवर्सिटी जइसे प्रतिष्ठित विदेशी विश्वविद्यालय मन ले घलोक आवेदन प्राप्त होए रहिस हे। ए आवेदक मन तीर डेलोइट, मैकिन्से, ओरेकल, माइक्रोसॉफ्ट, बोस्टन कंसलिंटग, नेस्ले, टाटा ट्रस्ट, सैमसंग जइसे बहुराष्‍ट्रीय कंपनी मन म काम करे के अनुभव हे। आवेदक मन के औसत आयु समूह 29 वर्ष हे। चिप्स ह एखर बर आउटरीच कार्यक्रम करिस जेमां एफएमएस अऊ आईआईटी दिल्ली म बूट कैंप अऊ ट्विटर, फेसबुक अऊ लिंक्डिन म सोशल मीडिया अभियान सामिल हे। स्टीयरिंग कमेटी ल उपर वाले प्रक्रिया के बारे म विस्तृत जानकारी दे गइस।




श्री एलेक्स पॉल मेनन ह बताइस कि अवइया 14 नवंबर 2017 ले ए फेलोज् मन ल छत्तीसगढ़ एकेडमी ऑफ मैनेजमेंट, निमोरा म 15 दिन के प्रशिक्षण देहे जाही। जेखर शुभारंभ मुख्य सचिव ह करहीं। प्रशिक्षण के समय चुने गए फेलोज् ल राज्य के वरिष्‍ठ अधिकारी मन के संग बातचीत करे के अवसर घलोक मिलही। टीआईएसएस मुंबई, आईआईएम रायपुर अऊ हार्वर्ड यूनिवर्सिटी के एजेंसी ईपीओडी कोति ले ये वाले प्रशिक्षण दे जाही। बैठक म पंचायत अउ ग्रामीण विकास विभाग के अपर मुख्य सचिव श्री एम.के. राउत, सूचना अउ प्रौद्योगिकी विभाग के प्रमुख सचिव श्री अमन कुमार सिंह, वित्त विभाग के प्रमुख सचिव श्री अमिताभ जैन, स्वास्थ्य विभाग के प्रमुख सचिव श्री सुब्रत साहू, खाद्य विभाग के प्रमुख सचिव श्रीमती ऋचा शर्मा, सूचना प्रौद्योगिकी विभाग के सचिव श्री संजय शुक्ला, सामान्य प्रशासन विभाग अउ सहकारिता विभाग के सचिव श्री डी.डी. सिंह, महिला अउ बाल विकास विभाग के सचिव डॉ. एम. गीता, लोक स्वास्थ्य यांत्रिकी विभाग के सचिव सुश्री शहला निगार, नगरीय प्रशासन विभाग के विशेष सचिव डॉ. रोहित यादव, ऊर्जा विभाग के विशेष सचिव श्री सिद्धार्थ कोमल परदेशी, वाणिज्य अउ उद्योग विभाग के विशेष सचिव डॉ. कमलप्रीत सिंह, समाज कल्याण अउ खेल अउ युवा कल्याण विभाग के विशेष सचिव श्री आर. प्रसन्ना, नवा रायपुर विकास प्राधिकरण के मुख्य कार्यपालन अधिकारी श्री मुकेश कुमार उपस्थित रहिन।